ليه رد فعلك بيختلف على موقف واحد لو اتكرر؟ وإيه الحل؟

ساعات كده وأنت قاعد مع حالك بيحصل موقف معين وتلاقي نفسك واخد عليه رد فعل إنك متعصب ومتضايق أو قرفان.. بعد أيام أو فترة قليلة بيحصل نفس الموقف وتلاقي نفسك رايق وبتتعامل معاه بروقان والدنيا لذيذة.. وممكن يتكرر هو هو تاني وتلاقي رد فعل تالت ومختلف خالص.. طب ليه رد فعلك بيختلف على موقف واحد؟ وإيه حل الموضوع ده؟! تعالوا نشوف

ليه رد فعلك بيختلف على موقف واحد؟

حسب موقع imotions  وموقع medium وموقع socialpsychology 

1- التكيف العاطفي

وهنا بيكون فيه حالتين لأن لما موقف يحصل معاك لأول مرة بتتأثر بشكل كبير عاطفيًا.. ولو الموقف ده اتكرر أول حالة بتكون إنك أدركت حجم التأثير وعارف بمعنى أصح اللي بيحصل ولو شوية فهنا بتتأثر أقل.. لكن فيه ناس تانية لو نفس الموقف ده اتكرر بتتأثر بشكل أكبر لأنهم بيشوفوا الموقف الأول والتاني وتأثيرهم جنب بعض فبيحس إن كده كتير!

وخلونا نوضح ده بمثال: لو حد قريب منك اتوفى أنت بتتأثر جامد ولكن بعدها بمدة مش كبيرة حد تاني اتوفى هيكون فيه حالتين وهما إنك ماتتأثرش زي أول مرة وتقدر تتقبل الموضوع أسهل شوية لكن فيه حالة تانية وهي إنك مقدرتش تتكيف عاطفيًا مع أول مرة اتوفى فيها حد فهتشوف حجم الموقفين مع بعض كبير وأنت مش قادر عليه

2- التوقعات اللي بتقع على دماغنا في الآخر

لو نفس الموقف حصل 3 مرات معاك بنفس الشكل.. في أول مرة مابيكونش عندك توقعات لكن تاني مرة بتبدأ يبقى عندك توقعات والموضوع تأثيره بيكون أقل وتالت مرة بتكون خدت مناعة وعرفت التوقعات إيه وتأثيره أقل بكتير.. لكن بما إننا مش متحكمين في المستقبل ممكن الموقف يتكرر للمرة الرابعة وتلاقي نفسك متأثر ومش بس كده لأ ممكن يكون تأثيره أكبر من كل مرة عادي

3- الخبرة

ودي مالهاش أكتر من حالة.. ولأن الخبرة دي حاجة مهمة أوي مع الموقف اللي بيتكرر وأهميتها هي إنك بتعرف تتعامل بشكل أفضل مع الموقف وبتعرف تتحكم في التأثير اللي بيحصل معاك وفي رد فعلك كويس وبرضه بيفقد حساسيته بالنسبالك وده بيخليك تبطل تتفاعل معاه بنفس الطريقة تاني

بمعنى لو أول مرة تنقل من أي مكان للقاهرة هتلاقي زحمة ودوشة وسرعة وفي الأول هتبقى متضايق ومش مستحمل وبعد وقت هتتعود ومش هتركز معاها بنفس الشكل وبالتالي رد فعلك هيختلف

وفيه نموذج اسمه The Big Five” Personality Traits Model” أو نموذج السمات الشخصية “الخمسة الكبرى”:

4- التأثيرات الجينية

الأبحاث بتقول إن 5-HTTLPR وده المسؤول عن جين ناقل السيروتونين واللي دوره الاستجابة العاطفية للمؤثرات السلبية فده لما يتنقلك وراثيا أنت بتستجيب أكتر وأقوى للمؤثرات أو المحفزات السلبية للمواقف أو الحاجات اللي بتحصل في حياتك

5- بنية الدماغ 

الدراسات بتقول إن فيه حاجة اسمها “اللوزة الدماغية” ودي مسؤولة عن معالجة العواطف والتعامل معاها.. واللوزة دي لو كبيرة عند حد بيميل أكتر إنه يظهر ردود فعل عاطفية أكتر للمحفزات السلبية.. وده معناه إن بنية الدماغ لما تختلف من شخص للتاني هيختلف رد الفعل برضه من شخص للتاني 

6- أنظمة النواقل العصبية

الاختلاف في الأنظمة العصبية وتكوينها من شخص للتاني بتلعب دور مهم أوي في اختلاف ردود الأفعال من شخص للتاني.. الأنظمة دي بتشمل حاجتين وهما “السيروتونين” و”الدوبامين” ودول ليهم دور حاسم ومهم جدا في تنظيم العواطف واضطرابات المزاج 

7- العوامل البيئية وسياق الموقف

الموقف اللي بيتكرر لو حصل تاني وجيت تاخد رد فعل عليه لو العوامل وسياق الموقف رايقين والدنيا تمام هتلاقي نفسك ما بتتأثرش زي قبل كده ولكن لو العوامل والسياق مش أحسن حاجة هتلاقي نفسك بتتأثر وتاخد رد فعل عاطفي أكتر من الأول

8- النجاح وإنك تفهم نفسك:

ولو بتمر بموقف متكرر وأنت ناجح وفاهم نفسك ده هيلعب دور مهم في التطور العاطفي ورد الفعل على الموقف واللي هيكون أكيد كويس وحلو.. على عكس ما تكون فاشل ومش محقق ذاتك ولا فاهمها فهنا رد الفعل هتكون مش متحكم فيه وهيتأثر أكتر

طب إيه الحل؟

1- اتحكم في تفكيرك

رد الفعل الكبير بيكون من الطريقة اللي أنت شايف بيها الموقف فلو دورت على تفسير هتلاقي سبب يخليك تقلل رد الفعل.. بمعنى حاول تسأل نفسك “أنا ممكن اتعلم من اللي حصل إزاي؟” بدل ما تقول “هو أنا دايمًا بيحصل معايا كده ليه!”

2- خد بالك من فخ التكرار

التكرار هيعمل حاجة من اتنين.. هيزود التوتر والقلق لما يحصل أو هيخلي عندك تبلد ومابتتأثرش.. والحالتين مش حلوين أوي فمحتاج توازن بينهم وتميل أكتر للتبلد ويبقى فيه شوية قلق صغيرين عشان تعرف حجم الموقف وده بيحصل لما تشوف الموقف بإنك تتقل عليه وقت بسيط وتستوعبه بعدين تختار

3- جرب الجديد

لو في مرة رد فعلك كان عصبية وزهق جرب في الموقف اللي بعده تاخد الموضوع بهزار وبساطة ومرة تالتة ببرود وهدوء.. وبعد كل مرة هتعرف امتى توظف رد الفعل الصح مع الموقف المتكرر

في النهاية رودو الفعل مش ثابتة حتى لو الموقف متكرر لأننا مش كمبيوتر ولا آلة.. لكن رد فعلك في كل مرة واللي بتتعلمه منه هيفرق معاك أكتر في اللي جاي وهيساعدك لو الموقف اتكرر أنت هتختار رد فعل عامل إزاي المرة دي ولايق ولا لأ من قبل ما تعمله