ليه زمان كنا بنقدر الصور وكانت حقيقية أكتر؟

مع التطور والتكنولوجيا اللي بقينا فيها ساعات بقينا ننسى نعيش اللحظة اللي قدامنا أصلا وبنصورها وخلاص وبنضمن إننا لما نروح نتفرج عليها أو لما الذكرى توحشنا هنقدر نتفرج على الصور والفيديوهات دي.. بس زمان كان قليل لما تلاقي حد عنده كاميرا والناس كانت بتستلف الكاميرات من بعض لو مسافرين أو عندهم مناسبة ويجيبوا فيلم وفيلم احتياطي وتفاصيل كتير أوي عشان بس يوثقوا اللحظات المهمة والحلوة.

ومع التطور اللي عشناه ده والصور اللي بتتظبط بالفوتوشوب وصور الـ AI والفلاتر وغيرهم من التفاصيل دي الصور ومعناها فقدت قيمتها عن زمان وده لأسباب كتير.. فتعالى نقولك ليه حسب ما قال موقع “lumas” وموقع “BBC” في أحد مقالاتهم:

1- التكنولوجيا زمان مقارنة بدلوقتي:

زمان الكاميرات كانت بتعتمد على أفلام تصوير بتحتاج تحميض وده كان معناه إن أي صورة بتتاخد لازم تكون مدروسة كويس عشان الفيلم مايخلصش على الفاضي، مش زي دلوقتي ممكن نصور 100 صورة ونختار منهم الأحسن ونعدلهم كمان ونظبط ألوانهم، غير زمان ماكنش فيه تعديل بالفوتوشوب أو فلتر بيغير الملامح فكانت الصورة بتعكس الحقيقة زي ما هي.

2- قلة الصور زودت قيمتها:

دلوقتي ممكن نلقط عدد مالوش أخر من الصور في اليوم لكن زمان الصورة كانت حاجة نادرة جدا وغالية، لأن الكاميرات ماكانتش متاحة بسهولة زي دلوقتي، ده خلى كل صورة تتصور كانت ليها قيمة حقيقية وكل تفصيلة فيها بتتحسب.

3- ماكنش فيه “ايديتس”:

الصور زمان كانت بتعتمد على الإضاءة الطبيعية والزوايا وتعبيرات الوش الحقيقية يعني مش لازم تتضحك بشكل معين، وماكنش فيه تعديل أو فلاتر بتخلي الملامح مثالية، وده كان بيخليها تعبر عن الواقع بحقيقته لكن دلوقتي التطور بقى يخلق صورة شكلها حلو بس مش شرط تكون حقيقية.

4- الجانب العاطفي والمجتمعي:

زمان لما حد يصور صورة كانت بتبقى حاجة لها قيمة اجتماعية، بتتوثق في ألبومات عائلية وبتفضل ذكرى للأجيال اللي جاية بس دلوقتي معظم الصور بتتاخد عشان السوشيال ميديا وبتمسح بعد فترة لو عايزين نمسحها عادي، عكس زمان كان صعب حد يقطع صورة أو يفرط بيها بسهولة، فبقينا نفتقد الإحساس الحقيقي اللي كان في صور زمان

في الأخر الفرق بين صور زمان وصور دلوقتي كلنا بنلاحظة لما بنفتح انستجرام أو فيسبوك أو أي موقع تواصل اجتماعي.. وبنلاقي إن الصور زمان كانت بسيطة وحقيقية وليها قيمة كبيرة وعدم وجود التكنولوجيا وقتها والـ”ايديتس” أو التعديلات على الصور كان مخليها أقرب للواقع.. وده اللي مخلينا لحد النهارده لما نشوف صورة قديمة نحس إنها أصدق بكتير من الصور اللي بنتصورها دلوقتي.