ليه فصل الربيع أجمل الفصول؟

الفنانة سعاد حسني قالتها من زمان الدنيا ربيع والجو بديع قفلي على كل المواضيع..طيب اشمعنى الربيع اللي غنتله الفنانة وميزته عن باقي الفصول؟..عشان كده في الموضوع هنقولك ليه فصل الربيع يعتبر أجمل فصول السنة وفقا لموقع betterplaceforests و businessinsider

-الجو بيبقى دافي:
يعني الجو طلع بديع فعلا.. لا هو حر ولا هو برد حاجة في النص رايقة كده وبيخلينا نبدأ نخرج ونشم هوا بعد ماكنا متكلفتين طول الشتاء من البرد

-الشمس بتبقى موجودة أكتر:
أشعة الشمس بنقدر نحس بيها بعد ماكانت مختفية عننا بسحب وغيوم الشتاء وبنقدر نستمتع بفيتامين د في جسمنا اللي كنا محرومين منه أخيرا

-بتقدر تفتح شباكك من تاني:
بعد ما قعدنا فترة كبيرة مقفلين عشان برد الشتاء و قلبة الجو في الربيع بنرجع تاني نفتح شباكنا ونشم الهواء اللي ماكناش بنشوفه وتهوي البيت وتخلي ريحته حلوة من تاني

-اليوم ساعاته بتطول:
بترجع ساعات النهار تطول من تاني وده بيخلينا نستمتع بالنهار أكتر ونحس إننا عندنا حاجات هنعملها قبل مالشمس تغيب

-الورد والشجر بيفتح في كل مكان:
وبنلاقي مظهره مبهج وريحته الحلوة مالية المكان وشكلها بس بيحسن حالتنا النفسية غير إن الأشجار مصدر مهم للأكسجين

موسم الفاكهة الموسمية اللي بنحبها:
زي فاكهة المشمش والتوت والكيوي اللي ثمارها بتطلع في فصل الربيع

الطيور بترجع من هجرتها الشتوية:
وبترجع تزقزق وتستمتع معانا بفصل الربيع بعد ما رجعت من هجرتها

عيد الربيع:
طبعا احنا نعشق الإجازات الرسمية عشان كده الربيع بيدينا فرصة نحتفل بيه وناخده يوم إجازة وناكل فيه فسيخ ورنجة وبصل براحتنا

بس خلي بالك وأنت بتستمتع بالربيع من الحساسية الموسمية خاصة الرمد الربيعي ولو عايز تعرف تحمي نفسك منها إزاي شوف الموضوع من اللينك ده