ليه فيه ناس بتعمل حاجات غريبة في الحر زي إنها تستغطى أو تستحمى بمياه سخنة
بما إن خلاص كلها كام يوم ونلبس في الصيف رسمي فعندنا شوية حاجات كده غريبة على الجو والأجواء بتاع الصيف بتحصل.. زي إنك تلاقي حد في عز الحر داخل ياخد دش سخن عادي جدًا أو داخل ينام ومستغطي ولا كأنه في أمشير وعز التلج.. فهل ده له تفسير؟
حسب TheGuardian وحسب Healthline وحسب NationalWorld
إيه هي الأسباب؟
قبل أي حاجة مش لازم الشخص يكون عنده علم بالمعلومة أو التفسير هو ممكن يكون بيعملها بالحب وعلى الله كده وجاية معاه بالبركة:
1- بالنسبة للاستحمام بالمياه السخنة فيه حاجة اسمها “Thermoregulation” أو التنظيم الحراري للجسم.. وهنا بيحصل حاجة هتحس إنها مش منطقية لكن ده بيحصل فعلًا وهو إن المياه السخنة بترفع درجة حرارة سطح الجسم وده بيفعَل آلية تبريد طبيعية عشان الأوعية الدموية بتتوسع في الأطراف واللي بتساهم في خفض درجة الحرارة تدريجيًا وبتزود التبخر في البشرة
2- كمان المياه السخنة بتنشط جهاز عصبي اسمه “اللاودي – Parasympathetic” وده بيهدي الجسم ويخفف من التوتر العضلي وبيديك شعور بالراحة النفسية.. وعشان كده خبراء النوم بينصحوا بدش دافي قبل النوم عشان هيخليك تنام أسرع
3- الإحساس بالأمان وده بالنسبة للغطاء وقت الحر.. حتى لو الجو مولع نار لما بتحط على نفسك ملاية أو غطاء سواء خفيف أو تقيل ده بيديك إحساس بالأمان والاستقرار وده مش عشان العفريت مش هياكلك من رجلك لأ.. ده عشان الجسم بيفرز هرمون اسمه “الأوكسيتوسين” واللي مرتبط بالراحة.. وكمان بالنسبة للناس السينجل ده بديل الحضن
4- شرب الحاجات السخنة زي الشاي والقهوة هو تفسيره الأوقع إنهم عادة متعودين عليها كل يوم لكن يٌقال إنه شبه الدش السخن بيخلي الجسم يعرق والعرق لما يتبخر بيبرد الجسم شوية
إمتى ده بيكون صح وإمتى بيكون غلط؟
1- الغطاء
صح لما: تتغطى بحاجة خفيفة خالص هتديك نفس الشعور بالأمان
غلط لما: يكون الغطاء تقيل أوي فيسخن جسمك ويحررك على الفاضي
2- الدش السخن
صح لما: بعد التمرين أو قبل النوم أو لعلاج عضلي أو نفسي
غلط لما: لو البشرة حساسة أو عندك ضغط مرتفع أو حرارة زايدة أوي
3- المشاريب السخنة
صح لما: الجو جاف أو الرطوبة قليلة وساعتها العرق بيزيد لما تشرب حاجة سخنة ويتبخر بعدها وده بيقلل حرارة الجسم
غلط لما: الجو رطوبة زيادة ساعتها هتحس بالجفاف لأن العرق مش بيتبخر لو الرطوبة عالية أوي
طبعًا الموضوع ملوش علاقة أوي بالمياه السخنة ولا الغطاء ولا المشاريب.. هي الفكرة كلها في الحاجة بتكون مريحة ليك بأنهي شكل وعشان كده بتعملها.. لو وصلت لهنا قولنا إيه من الحاجات الغريبة بتعمله في الحر وبيكون مش منطقي؟
