ليه فيه ناس بتفضل تربي حيوان أليف عن إنها تخلف طفل؟

لما مامتك بتقولك عاوزين نفرح بيك/ي ونشوف ولادك بترد تقولها ما أنا عندي بنتي أهي “بتشاور على القطة أو الكلب بتاعك”.. فيه ناس بتحس تجاه حيوانتها الأليفة إنها أولادهم.. بس هو ليه ممكن تقرر تربي حيوان أليف وماتربيش طفل؟

مجلة plos one نشرت دراسة سنة 2014 عملتها مستشفى ماساتشوستس العام في بوسطن عشان تعرف العلاقة بين الرابطة اللي بين الأم والطفل والرابطة بين الإنسان والحيوان الأليف وده من خلال تحليل وظايف الدماغ المرتبطة بالعواطف.. ونتيجة الدراسة كانت إن الأمهات اللي شافوا صور لكلابهم ظهر في مناطق الدماغ المرتبطة بالعواطف نفس ردة الفعل اللي ظهرت لما عرضوا عليهم صور لأطفالهم.. على الرغم إنهم لما عرضوا عليهم صور كلاب مايعرفوهاش محصلهمش أي ردة فعل في الجزء الخاص بالعواطف في الدماغ

صحيفة USA Today و OnePoll عملت استطلاع رأي سنة 2023 نتايجه كانت إن 67% من المشاركين اللي كانت أعمارهم بين 18 لـ 26 سنة فضلوا إنهم يربوا كلب بدل ما يخلفوا طفل.. والاستطلاع كمان وضح إن التكلفة العالية لتربية الأطفال وسهولة تربية ورعاية الكلاب كانت من الأسباب اللي بتخلي الناس تفضل تربي حيوان عن طفل.. ووضح كمان إن إنجاب الأطفال مابقاش أولوية في الوقت الحالي عند الناس

بس فيه أسباب تانية بتخلي الناس تفضل تربي حيوان أليف عن إنها تربي طفل.. هقولك إيه هي حسب موقع Pawlife:

• اعتبارات نمط الحياة  

الحياة دلوقتي إيقاعها سريع ووقتنا بقى قليل.. ففكرة إنك تخصص وقتك كله لتربية طفل شئ صعب.. في حين إن تربية حيوان أليف هتديك شعور بالونس والأمومة/ الأبوة بس بقدر قليل من الوقت وكمان المسؤولية.. والرأي ده أكدته دراسة عملتها مجلة “سايكولوجي توداي”

• الأوضاع الاقتصادية

الدخل وفرص العمل من الحاجات الأساسية اللي بيقوم عليها أي بيت مستقر واللي حاليًا متغيرة وغير مستقرة.. وده مأثر على قرارات الشباب في تكوين أسرة.. ومجلة فوربس بتقول إن التكلفة السنوية لتربية طفل بتزيد في المتوسط عن متوسط التكلفة السنوية لرعاية حيوان أليف بخمس أضعاف

اللي بتحصل طول الوقت مخلية فيه عدم استقرار 

• تغير رؤية الشباب عن فكرة الأسرة

في وقتنا ده الشباب بقى بيشوف الأسرة والعلاقات بشكل مختلف عن اللي زمان كانوا بيشوفوا بيه الأسرة

• المرونة 

تربية حيوان أليف بتدي حرية ومرونة عن إنك تربي طفل.. وده علشان الحيوانات الأليفة مش محتاجة إشراف مستمر أو قرارت تربوية وتعليمية كتيرة بنفس القدر اللي بيحتاجه الطفل.. والمرونة دي بتخلي الناس قادرة تسافر وتقوم باهتمامتها الشخصية وكمان تعيش حياة اجتماعية بحرية من غير مسؤوليات.. وفي استطلاع عملته مجلة Psychology Today قال إن ٤٩٪ من الستات اللي شاركوا فيه قالوا إن الأشخاص اللي عندهم أطفال أكثر توترًا من اللي معندهمش

• الرفاهية العاطفية

الأبحاث بتقول إن الحب غير المشروط والولاء اللي بتديه الحيوانات الأليفة لصاحبها بيقلل شعور الوحدة وبيعزز الصحة النفسية

سواء كنت حابب تربي طفل أو حيوان أليف.. افتكر دايمًا إن التربية مسؤولية كبيرة اختارها لما تكون قدها وجاهز نفسيًا واجتماعيًا لخطوة زي دي.. لأنك بتشكل معتقدات وأفكار الطفل كأنه صفحة بيضا بترسم عليها.. أما بالنسبة للحيوان الأليف فهو كمان مسؤولية محتاج رعاية واهتمام مش أوبشن إتك تقرر في وقت من الأوقات إنك عاوز تتخلى عنه أو تسربه لأنه روح في الآخر لازم تعتني بيها