ليه فيه ناس “عاشقة للدراما والنكد”؟

عشاق الدراما نوعية من الناس موجودين في حياتنا كلنا، ومش بس كده، لا! ده أحيانًا ممكن انت نفسك تقع في فخ الانسياق مع صناعة دراما في حياتك من مفيش، لأسباب نفسية ممكن تكون مش مدركها بشكل مباشر في وقتها! والدراما أو اختلاق الدراما، هي إنك تبقى في مواجهة مع مشكلة ممكن حلها وانت متعمد تجاهل كل الأبواب والحلول.

 ذكر موقع “psych central” في إحدى مقالاته إن وجود صراع وتبعات مبالغ فيها لمشكلة حصلت بيكون له مكاسب، زي إن ممكن يبررلك تصرفات كتير لمجرد إنك حاسس إنك ضحية، زي إنك تشرب أو تدمن أو تقصر في شغلك أو تعامل الناس بشكل مش كويس… وما إلى ذلك من تصرفات مش هتحب أو مش هتقدر تواجه إنك تعملها من غير سبب.

في نفس السياق بيكمل المقال وبيوضح.. ليه الناس بتحب تعيش في الدراما؟

1- لأن ده بيبقى إلهاء مناسب عن إنهم يفكروا في حياتهم الشخصية

فيه ناس بتستصعب إنها تبقى في مواجهة مع نفسها، وإنهم يبقوا متفرغين للتعمق مع احتياجاتهم أو اتخاذ خطوات فعالة لإسعاد نفسهم، بالتفكير في المشكلة اللي حصلت من سبع سنين ولسه مأثرة فيه، أو الشخص اللي أثار غضبه الشهر اللي فات، ده أسهل، زي فكرة إنك تتفرج على التليفزيون عشان تتلهي وماتفكرش إنك محتاج تنضف البيت.

2- الدراما مألوفة أكتر!

للأسف ناس كتير خلال نشأتها شافوا مشاكل أو صدمات خليتهم متآلفين تمامًا مع المشاركة غير الفعالة في الأزمات، والتعود بس على التأثر بيها والشكوى منها باستمرار، والواحد دايمًا بينجذب للشي اللي اتعود عليه.

3- إدمان الغضب

في الغضب بيتم إفراز مواد كيميائية زي الدوبامين ودي بتحسس الواحد بالرضا والسعادة وأحيانًا ممكن إدمانها زي ما بيشرح موقع “Anger mentor” في مقاله ده:

http://angermentor.com/secrets-of-anger-addiction-and-why-rage-feels-real-damn-good

4- الدرما بتدي إحساس بالأهمية

شكوتك المستمرة إنك ضحية أو محل غضب أو سخرية بيثير اهتمام اللي حواليك، وبيرضي حاجة جواك نفسها إنك تكون جزء حيوي من حياة الناس، وده ممكن نلاقيه في حكمة قديمة بتتقال للآباء وهي: “احرص على عدم تجاهل طفلك لأن الطفل سيسعى إلى الاهتمام السيئ مقابل عدم الاهتمام؟”

في النهاية مش عيب إنك يبقى عندك مشكلة فعلية أو أزمة في حياتك وبتمارس زعلك عليها، بالعكس ده في كتير من الأحيان بيكون صحي أكتر إنك تقدر تعبر عن مشاعرك، لكن اللي مش صحي هو المبالغة في نسج تبعات لقصتك، أو التخاذل في الاتجاه الفعال للحلول اللي بالفعل متاحة عشان بس الاستمرار في الشكوى وإنك تفضل مستخبي فيها من مواجهة حياتك وبتبرر بيها تصرفاتك السيئة!