ليه في ناس بتقاطع في الكلام وإزاي نتعامل معاهم؟

كام مرة كنت بتتكلم في موضوع ومندمج كده لاقيت واحد مقاطع كلامك وقاطع معاه حبل أفكارك ويقولك الجملة الأرخم على الإطلاق “بدون قطع كلامك بس….” طب ما انت قطعته أهو يبقى بدون إزاي بس؟!

قبل ماتتعصب عليه وتفقد أعصابك تعالى نحاول نفهم الشخص اللي بيقاطع ده بيعمل كدا ليه..

حسب دراسة اتنشرت على موقع Verywell Mind 

المقاطعة وقت الكلام بيبقى لها كذا سبب زي..

• الخلفية الاجتماعية والثقافية

بعض الناس تعلموا من بيئاتهم أو من عادات ثقافية أن المقاطعة جزء طبيعي من الحوار مش أزمة يعني

• رغبة في السيطرة والتحكم

في ناس بتحب تهيمن على الحديث وتوصل أفكارها بسرعة قبل ما الطرف التاني يكمل كلامه للآخر

• الاندفاع والحماس الزيادة

ممكن الشخص يقاطع لأنّه متحمس جدًا للي بتقوله وما بيقدرش يصبر لحد الآخر

• قلة الوعي بالسلوك

في ناس ماتعرفش إنهم بيقاطعوا أصلًا.. بيشوفوا ده تفاعل طبيعي في الحوار

• العوامل الاجتماعية أو الفروق بين الجنسين

اتعملت دراسات أظهرت إن الناس ممكن تختلف في نمط المقاطعة باختلاف الجنس في الحوار 

حسب دراسة اتعملت في جامعة جورج واشنطن George Washington University  عن سلوك المقاطعة بين الرجال والنساء في المحادثات 

الرجالة بيقاطعوا الستات بنسبة أعلى 33% مقارنة بالمقاطعات بين الرجال نفسهم

خلال محادثة مدتها 3 دقايق..
الرجالة قطعوا كلام الستات بمتوسط 2.1 مرة.. نفس الرجالة قطعوا الكلام لما يتكلموا مع رجالة تانية 1.8 مرة بس.. أما الستات في الدراسة دي قاطعوا كلام الرجالة في المتوسط مرة واحدة بس في نفس المدة

في كل الأحوال وأيا كان السبب ده سلوك غير محتمل ومزعج بل وشديد الازعاج لناس كتير وتكراره مابيبقاش مجرد شئ مزعج أوقات بيبقى له  تأثيرات حقيقية في التواصل والعلاقات زي إنه بيقلل من الاحترام المتبادل.. الشخص اللي بيتكلم ممكن يحس إن أفكاره أقل أهمية وبيدي انطباع بسيطرة الطرف المقاطع على الحوار 

طب نتعامل إزاي مع الناس دي؟

• قبل الكلام..حدد قواعد للحوار قبل ما تبدأ زي “هاتحبي تسألي بعد ما أكمّل النقاط كلها؟” لو انت مجرب الكلام مع الشخص ده وعارف إنه بيقاطع كتير

• وقت الحوار.. لما تتكرر المقاطعة قول مثلاً “ممكن أكمّل كلامي لو سمحت/ي؟” عشان تديه إشارة لو مش منتبه إنه قاطعك كذا مرة

• بعد الحوار.. اتكلمي مع الشخص في وقت هادي عن تأثير الطريقة دي عليك واستخدم عبارات “أنا حسيت بـ…..” بدل الاتهام

• راجع أسلوبك.. فكر في طريقة كلامك وهل محتاج تكون أكتر وضوح واختصار لتقليل فرص المقاطعة

• الصبر.. تغيير السلوك مش بيحصل بين يوم وليلة لكن بالتحضير والصبر ممكن تحسن الحوار من ناحيتك