ليه كل ما تظبط جزء من حياتك.. الباقي بيضرب؟
كتب: عمر عزت
فيه حاجة كده يعتبر كلنا بنعاني منها وهي إن لو إنت مقسم الحياة لأجزاء “شغل أو دراسة – العلاقات الاجتماعية – العلاقة العاطفية – الحتة الأسرية – الجانب النفسي والجسدي وغيرهم” هتلاقي نفسك كل ماتيجي تظبط حاجة من دول التانية تضرب.. طب ليه؟ والحل إيه؟
فيه مصطلح كده اسمه “عجلة الحياة” وده بكل بساطة تقسيمة حياتك لأجزاء أساسية بتشكلها ومالهاش قاعدة معينة.. أنت اللي بتحط الأجزاء دي وتشوف حابب تكون متكونة من كام جزء حسب حياتك ماشية إزاي وأولوياتك إيه بالظبط؟
تعالوا نعمل Pause للحياة كده ونركز فيها..
تقسيمة عجلة الحياة اللي قولنا عليها دي موجودة دايمًا طول الوقت بس إحنا مابنركزش معاها.. بس لما نيجي نركز ونبصلها كده بالهدواة غالبًا هتلاقي نفسك مثلا مظبط فيها جزء أو اتنين وممكن تلاتة لو أنت بطل ولما تبص لباقي الجوانب هتلاقيها مضروبة طلقتين 6 ريختر!
وهنا بتبدأ تركز على الجزئين اللي واقعين وفعلًا بيظبطوا بس فجأة! بس الباقي بيبدا يبوظ واحدة واحدة
تعالوا ندوس على زرار الـ Play للحياة تاني ونشوف..
الحياة شغالة وفيه جوانب شغالة كويس وجوانب بايظة طب ليه كده؟
من الأسباب اللي بتخلي ده يحصل هو إن “التوازن مش سهل” والحياة مليانة حاجات كتير لو جيت تركز على جزء التاني هيبوظ.. كمان “الضغط والتوقعات العالية” ودول بيحصلوا لما تظبط جزء من حياتك والجلالة تاخدك حبتين والنتيجة دايمًا هتبهرك.. عندك “التغيرات السريعة” وده لأن ريتم الحياة مش سهل تواكبه لو بتلعب على كذا جانب وكل جانب بيتغير لوحده وأنت مش أخطبوط بـ 8 أيادي هتعرف تمسك كل حاجة في نفس الوقت.. وأهم سبب “الإرهاق والتشتت” وهنا فيه وقت كده هتلاقي نفسك وصلت إنك بتظبط كل حاجة وخلاص 80% وباقي حاجات بسيطة بس بتكون فرهدت ومش قادر فعلًا تعمل حاجة فا فيه حاجات هتقع منك وحاجات ممكن تكمل.. وفيه إن “تحكمك في الحاجات مش كامل” ولأن كل جزء بيتكون من حاجات تقدر تتحكم فيها وحاجات خارجة عن إراتك فممكن تبوظ وأنت مش عارف تعمل حاجة!
طب نعمل إيه في الموضوع ده؟ “عجلة الحياة” أو “Wheel Of Life”
حسب موقع positivepsychologyوموقع mindtools
اللعبة كلها في كلمة واحدة وهي “التوازن”.. إحنا هنا على الأرض ومش عايشين في الجنة وده بيقولك حاجة مهمة وهي إنك “صعب أو يمكن مستحيل تحقق المعادلة الكاملة في كل حاجة”
فيه نظام ممكن تستخدمه في حياتك اسمه عجلة الحياة وده بيقولك إن أول حاجة أساسية محتاج تهتم بيها وتظبطها طول الوقت هي “تظبيط احتياجاتك النفسية” لأنك لو مش مظبط الجزء ده مش هتقدر غالبًا تتعامل مع باقي الأجزاء
وعشان بتحب الأكل هنشبهلك الموضوع بالأكل وبأكلة بتحبها كمان وهي “البيتزا”.. بس هنا هتقسم أجزاء الحياة حسب أولوياتك أنت وتشوف هم كام نقطة وقسم البيتزاية على مزاجك كده كده هتاكلها لوحدك
بعد ماتقسمها وليكن لـ 8 أو 6 أو حتى 4 وبعدها هتدي لكل جزء “المثلث” أرقام من 1 لـ 10 وبعدين في قاعدة رايقة مع نفسك تبدأ تقيم كل جزء كام من 10 وتشوف راضي عن إيه ومش راضي عن إيه ومحتاج تظبطه وتحط نقطة عند كل رقم تقييم وتوصلهم ببعض هم المفروض يبقوا عاملين زي الدايرة لما توصلهم عشان يكون فيه توازن بس أنت غالبًا هتلاقي الشكل طالع شبه العجينة المكعبرة دي ومش عامل دايرة وده بيمثل طاقتك متوزعة إزاي على الجوانب
بعد ما تبص للشكل اللي طلعلك اسأل نفسك شوية أسئلة:
1- حاسس بإيه وأنت شايفه؟
2- عايز تغير الشكل إزاي؟
3- إيه أكتر جزء فاجئك؟
4- إيه اللي محتاج يتظبط؟
5- إيه اللي محتاج تبدأ بيه؟
6- دلوقتي بتعمل إيه في كل جزء؟
7- هل فيه جزء واحد لو ظبطته ممكن يظبط أكتر من جزء معاه؟
هنا بقى تحدد هتغير إيه وهتشتغل عليه.. ولو حاجة هتاخد وقت طويل حددله حاجات ووقت عشان تشتغل Smart مش Hard واتقل على الرز عشان يستوي بمعنى تديله وقته فعلًا.. وكل حاجة تظبطبها تبدأ تضيفها وتعدلها في الشكل المرسوم جوه البيتزاية
وأخيرًا من اسمها كده “عجلة الحياة” معناه إنها بتدور وتتكرر كل فترة وده معناه إنك محتاج تراجع العجلة دي وتسجل النقط على حسب اللي حاصل في الوقت ده وهكذا.. كل ده مش بس هيفيدك في تظبيط أجزاء حياتك بل هيديك مساحة تفهم نمط سلوكك العام وأي أفكار أو مشاعر سلبية وده برضه هيديك مساحة تنضج أكتر وتفهم أكتر وهكذا..
