ليه لمة الأكل مع أهلنا أو اللي بنحبهم مفيدة لينا؟

ليه لمة الأكل مع أهلنا أو اللي بنحبهم مفيدة لينا؟

في ناس بتحب تاكل لوحدها عشان أسباب كتير منها تجيب كميات قليلة أو تنجز نفسها بأكلة سريعة أو مايبقاش في اختيارات وحيرة مع الناس اللي هياكلوا معاهم وفيه ناس ظروف حياتهم بتفرض عليهم يكلوا لوحدهم كتير.. لكن الموضوع زي ما يبان منجز وبيختصر في الوقت بس له أضراره ومنها إنك ممكن ماتختارش أكل صحي وتاكل كمية قليلة فعلًا مش الكمية اللي جسمك محتاجها فا خلونا نشوف هل فيه فوايد أكتر للأكل الجماعي ولا لأ..

حسب موقع healthlinkbc في شوية فوايد كده للأكل الجماعي ممكن تستغلها:

أولًا التجمعات العائلية:

قبل مانبص للأكل نفسه الفايدة هنا هي إنك تحافظ على الروابط الأسرية وإنك تحس بإنتماء لمجموعة اللي هم أهلك.. الأطفال بيحتاجوا حاجة زي دي عشان يحسوا بالحب والأمان ويكون في مجال للنقاش في اليوم بتاعهم ويشاركوه مع أهاليهم والأهم كمان يتعلموا إن في حاجة إسمها “القيم والتقاليد الأسرية”

ثانيًا تغذية أفضل:

في الغالب الأكل بتاع العيلة بيكون اختياره فيه العناصر الغذائية المفيدة مش زي الوجبات السريعة سواء من برة البيت أو اللي متحضره بسرعه جوا البيت.. غالبًا هيبقى متوفر أنواع كتير من الأكل زي الخضار والفواكة واللبن والبروتينات والبقوليات فا تكون متعرض بشكل أقل للدهون والسكريات وكمان ممكن يفيدك كفرد عشان لو قضيت فترة لوحدك إنك تبقى متعلم الطبخ وتقدر تساعد نفسك.

ثالثًا الوقت والفلوس:

وجبة فرد لوحده أيًا كانت هتتحضر في البيت أو هتشتريها جاهزة ساعتها هتكون مكلفة وكتير.. لكن لما يبقى في نظام هتقدر تظبط وقتك وفلوسك وهتبقى عارف هتاكل إيه ومش هتكلف زيادة عن اللي أهلك بيصرفوه مخصوص أصلًا للأكل.. الوقت هتكون عارف هتاكل إيه وامتى وساعتها هتقدر توفر وقت في يومك وتنظم نشاطاتك على أساسه

رابعًا المساعدة:

لما بتشارك في حاجة هتاكلها هتحس إنك عملت خطوات ومجهود وهتتبسط بالأكل.. كمان التنويع في الأشخاص ممكن يعمل إضافات حلوة للأكل عشان بيتعمل بمزاج وفي النهاية هيتوزع المجهود بتاع لم الأكل وغسيل المواعين مابين أفراد البيت كلهم لو متعودين على التعاون من الأول.

في النهاية في ناس مابتقدرش تاكل معاهم في البيت لظروف كتير وكمان مش كلنا بنكمل في بيت الأهل وفي ناس بتبقى مغتربة وبعيدة عن أهلها.. بس لو من الأول متعلمين التعاون والنظام الأسري في الأكل هيطبقوا ده في المكان اللي هم فيه سواء النظام أو الأكل الصحي والمفيد أو طريقة عمل الأكل أصلًا وكمان هيقدروا يتعاونوا لو في ناس تانية معاهم بيعملوا أكل.