ليه ماتشربش مياه ساقعة أوي في الصيف؟

مع دخول فترة “موجات الحر” اللي بتحصل كل فترة وكل موجة ما شاء الله بتتألق زيادة عن اللي قبلها.. كلنا بنحاول نواجه الموضوع ده بطرق مختلفة اللي بينط في البانيو أو حتى بياخد دش كل 3 دقايق من غير بانيو عادي.. واللي بيقضيها عصاير واللي تحت التكييف حتى لو في المحلات اللي في الشارع.. بس في ناس بقى بتحب تشرب مياه ساقعة ومش بس ساقعة لأ بتكون متلجة أو قربت تتلج ودي ليها أضرار فا حبينا نقولك شوية أضرار للمياه الساقعة عشان تاخد بالك منها..

طب إيه هي أضرار المياه الساقعة؟

حسب موقع Indian Express وموقع Only Myhealth

1- بيخفض معدل ضربات القلب:

درجة حرارة المياه المتلجة بيتحفز عصب اسمه “العصب القحفي العاشر” أو المبهم وده جزء مهم من الجهاز العصبي.. لما بتشرب المياه ساقعة زيادة ده بيخليه يخفض معدل ضربات القلب.. والقلب زي ما كلنا عارفين مش ناقص حوارات

2- جيوب أنفية وصداع:

طبعًا احنا معظمنا مولودين عندناه صداع والتعامل مع الصداعاه حاجة مقرفة.. لما بتشرب مياه ساقعة كتير  ده بيبرد الأعصاب الحساسة في العمود الفقري وده بيهيأثر على الدماغ عشان كده هتلاقي نفسك بتواجه مشاكل صداع وجيوب أنفية مع بعض 

3- إمساك:

حاجة لا نتمناها لألد أعدائنا لما يجيلك إمساك.. وهنا شرب المياه  الساقعة بيخلي الأمعاء تنكمش وكمان بيجمد الأكل والمياه الساقعة من الأسباب الرئيسية للإمساك.. فا على إيه وجع الـ.. قلب؟

4- الدهون:

حرق الدهون والمياه الساقعة زي انت وصاحبتك كده عمر ما بيبقى فيه بينهمنكم تفاهم.. فا هتلاقي نفسك بتفكر تعمل دايت ولا حاجة أو عايز تخس والمياه تعمل حوارات لحرق الدهون وما ياخدش فرصته 

5- التهابات الحلق:

بتزود المياه الساقعة فرصة الإصابة بالتهاب الحلق خصوصالق.. كمان مناخيرك ممكن تتسد خصوصا بعد الأكل لو شربت مياه ساقعة عشان بيراكم المخاط بيتراكم بزيادة وبيعمل قلق مع الغشاء المخاطي للجهاز التنفسي فا هتلاقي كوكتيل التهابات أصعب من كوكتيلات ميدلي تامر عاشور

6- مشاكل في الهضم

لما تشرب مياه ساقعة كتير  المعدة بتنكمش وماتعرفش تهضم.. وإنت درجة حرارة جسمك بتتفاجئ وتعيش فترات مش لذيذة في العموم

7- حساسية الأسنان

وجع السنان أصعب من وجع الفراق فا مش محتاجين نقولك بقى تتجنب المياه الساقعة ليه.. بس هنقول كيعني إن وقت لما تشرب مياه ساقعة سنانك هتوجعك.. ومش هتعرفماتعرفش تاكل ولا تشرب حاجة فا خليك في المضمون

طبعًا في الأخر كلنا عارفين أهمية المياه فا لازم نحط جنبنا إزازة ودايمًا نشرب منها عشان الدنيا تبقى تمام في الكلى وكل الأجهزة المجاورة لأن المياه مهمة في حاجات كتير زي إنها بتخلصك من الوزن الزيادة والدهون وتنظيم درجة حرارة الجسم وليلة كبيرة كده كلها أهمية مهمة.. يعني بس مش لدرجة إنك تشرب مياه ساقعة أوي أو متلجة.. فتبقى بتظبط جسمك بشرب المياه والناحية التانية بتضربه بالمياه الساقعة وتجيبله مشاكل.. ظبط الكلام عشان كله يبقى تمام