ليه محمد عدوية ماينفعش يتحط في خانة أبناء العاملين؟
في عيد ميلاده الـ 49.. لقينا إنه مش واخد حقه.. بالذات مع الأجيال الأجدد.. ومع إن دايمًا ولاد الفنانين بيتحطوا في خانة “أبناء العاملين” وهو مش ابن أي فنان ده ابن واحد من أعظم من غنوا شعبي.. أحمد عدوية.
لكن “محمد عدوية” قدر مع مرور الوقت يخلق
ليه شخصية فنية مختلفة ومتفردة
كتير يعرفوا محمد عدوية من ألبوم “الطيب أحسن” سنة 2003.. واللي كان فيه أغاني لسه بتتسمع لحد دلوقتي زي “ولا كان”
محمد ابتدى من قبلها بحوالي 7 سنين.. وعمل ألبوم “علمني أغني” سنة 1995 وبعدها بسنة ألبوم “ما تسيبونا” والألبومين كانوا شعبي أكتر ولون “أحمد عدوية” كان باين فيهم وغنى أغاني من أغانيه كمان.. وننصح أوي تسمعوا ألبوم “علمني أغني” بالذات لو انتم من محبي جورج وسوف وهو صغير.. علشان هتحسوا بنفس الـ vibes في الألبوم ده.. محمد عدوية كان ممكن يكمل في نفس السكة واللون ومحدش يقدر يعاتبه على ده بس هو قرر…
يختـار لونـه
في الألبوم اللي لسه متكلمين عليه من شوية “الطيب أحسن” سنة 2003 واللي كسر الدنيا ساعتها.. وبقى فيه..
أغاني ماينفعش نسمعها إلا بصوته
صوت محمد عدوية عنده خلطة تخليه ياخد ميكس من من الشعبي متوظف بطريقة مفيش زيها في أغانيه.. زي أغاني “المولد” واللي غنى فيها مع “أحمد عدوية” و”سامحني يابا” تتر مسلسل حواري “بوخاريست” سنة 2015
وغيرهم.. وده اللي مخليه..
ليه طعم خاص في أغانيه
وانت بتسمع محمد عدوية مش هتلاقي نفسك بتقول “بيفكرني بأحمد عدوية” حتى وهو بيغني معاه.. ودي حاجة حلوة للفنان أنه يبقى هو.. هو.. مش حد تاني
وفي أغاني ليه ممكن ماتقدرش تتخيل إن حد تاني يغنيها.. منها
2- كام سؤال
3- دي اللي خدتني
4- سيبي روحك
رحلة بدأت من حوالي 30 سنة ولسه مستمرة..
لمطرب عنده صوت مايختلفش عليه اتنين
وشخصية عمرنا ما سمعنا عنها أي مشكلة.
في النهاية قولوا لينا متفقين معانا ولا لأ؟ وإيه أكتر أغاني بتحبوها لمحمد عدوية؟
