ليه مش لازم تاخد قرارات للسنة الجديدة؟

في الوقت ده من كل سنة بنحس بشعور سيء تجاه نفسنا واللي حققناه وللأسف مابنشوفش الحاجات الحلوة اللي حققناها وبنبص لكل حاجة وحشة حصلت معانا وده بيخلينا ناخد قرارات متسرعة علشان نحمي نفسنا في السنين الجاية ولكن مش دايما القرارات دي بتكون صح ومش كل اللي بياخد قرارات في الوقت ده بيقدر ينفذها
علشان كده هنقولك في الموضوع ده ليه مش مهم ناخد قرارات قبل السنة الجديدة وفقا لـ   everydayhealth  و time

وفقا لموقع everydayhealth  في دراسة اتعملت سنة 1988م تابعت 200 شخص خدوا قرارات جديدة للسنة لقوا أن 77% منهم فضلوا متمسكين بقراراتهم بعد أسبوع واحد من السنة و43% فضلوا متمسكين بقراراتهم بعد 3 شهور و 19% فضلوا متمسكين بقراراتهم لمدة سنتين وكتير منهم قالوا إنهم بيعانوا من نقص قوة الإرادة

ودراسة تانية لقت أن 46 بالمائة بس من أصحاب القرارات قالوا إنهم نجحوا
في الالتزام بقراراتهم بعد 6 شهور من السنة الجديدة

دكتور سيث جيلهان المتخصص في علم النفس بيقول إن مشكلتنا إننا بنحط أهداف كبيرة غير واقعية وعايزين نعمل تغيير كبير في حياتنا مرة واحدة!
زي ما نقرر فجأة إن هناكل أكل صحي من أول السنة الجديدة بعد ما كنا طول حياتنا بناكل كل حاجة من غير حساب..
علشان كده لازم نحدد هدف لسلوكنا علشان نقدر نغيره ونلتزم بيه ساعتها لأن ده هيخلينا نعمل خطوات صغيرة توصلنا للي عايزينه بدل القرارات الكبيرة اللي مابتوديش في حتة وبتخلينا واقفين مكاننا علشان كده في شوية حاجات لازم تعملها علشان تقدر تحقق أهدافك..

1-اعمل كل حاجة خطوة بخطوة

ناتالي ماكنيل -رائدة أعمال إعلامية حائزة على جائزة إيمي- ومؤسسة موقع SheTakesOnTheWorld.com بتقول في مقالة في Time” بدل ماتكتب قراراتك للسنة الجاية على الفيس بوك أو تعلقها على الحيطة خليك واضح مع نفسك وحدد أولوياتك وأهدافك كويس وبعد كده قسمها على وقت محدد يكون مناسب ومنطقي”

يعني ماتقولش بكرا هكون إنسان جديد أدي نفسك وقت فعلا تقدر تطور فيه من نفسك وماتستعجلش..

2-اختار  الوقت المناسب ليك

بداية السنة الجديدة مش وقت سحري بزرار هيغيرلك حياتك أنت تقدر تحقق هدفك في أي وقت في السنة طول ما أنت مركز فيه ومحدده كويس وشايفه قدامك بس المهم تكون بتعمل أهدافك في وقت مرتاح فيه من غير ضغوطات

3-حاول تخلق عادات صحية جديدة

لو قررت تختار عادات صحية ليك ولصحتك وحياتك في السنة الجديدة من غير تسرع ساعتها هتقدر تعمل تغيير يستمر معاك على طول لأن تطوير العادات بيساعد العقل إنه يتبرمج على الحاجات الجديدة ويتعود عليها مع الوقت

4-حاول تتقبل فكرة إن في حاجات مالكش يد فيها

في حاجات ممكن تكون بتوقفك علشان تحقق اللي عايزه زي الأمور المادية ودي حاجة ممكن تحسسك بالإحباط لكن ماتسيبش ده يسيطر عليك وحاول تتعامل باللي عندك ده وتفكر ازاي ممكن تحقق أهدافك بإمكانياتك

5-حاوط نفسك بأشخاص بيحبوك وبيدعموك

ابعد نفسك عن الناس السلبية اللي بتقلل من أهدافك وفكرة إنك ممكن تتغير وخليك مع ال support system بتوعك سواء أهلك أو صحابك يشجعوك على القرارات الصحية اللي بتاخدها ويشاركوك فيها علشان تتشجع وماتكسلش

6-افتكر إن الأهداف مش للكارير بس

وأنت بتخطط للأهداف بتاعتك متنساش إن راحتك النفسية ليها عليك حق هى كمان فلازم تخطط كمان لوقت تسيبه للحاجات اللي بتحبها وبتبسطك وكمان ماتنساش تخطط ازاي تحافظ على صحتك وعلاقاتك المهمة لأنهم مايقلوش أهمية عن الشغل

7-فكر نفسك بأهدافك دايما

استخدم كل الطرق اللي ممكن تفكرك بالحاجة اللي عايز تعملها زي إنك تعمل reminder على الموبايل أو تكتب في الـ note حاجات تفكرك المهم تبقى حواليك حاجات تشجعك ماتكسلش
في الآخر لازم تفتكر إن كل حاجة بتحتاج وقت ومجهود وأنك تغير حاجة في سلوكك بتعملها من سنين ده شيء صعب ومحتاج صبر ووقت فماتضغطش على نفسك وخليك طيب معاها وأفضل حاول وحتى لو وقعت مرة ماتقلقش حاول تاني وتالت وهتقدر..