ليه مفيش نصيحة تنفع لكل الناس؟

لو انت قاعد في مرة مع صحابك وبتشوفوا هتعملوا إيه في مستقبلكم

ولقيت صاحبك اللي على يمينك قالك إن الحل إنكم تاخدوا كورس

فرنساوي.. وإن دي أحسن لغة تتعلمها دلوقتي.

فا صاحبكو التالت.. اللي قاعد على شمالك أيوه.. قال لأ.. أحسن لغة دلوقتي الألماني.. هتسمع كلام مين؟

هتقولي هشوف مين فيهم الصح.. مش كده؟

طب تعالى نفترض إن الاتنين صح.. صاحبك الفرنساوي شايف إنه دي لغة شيك وأخدناها في المدرسة وسهل نكمل عليها.. وإن مش كتير مركزين معاها فهتبقوا مميزين.

وصاحبك الألماني قالك دي لغة بتتكلمها دول كتير مش واحدة بس.. آه أصعب في النطق شوية بس هي التريند دلوقتي.. معروفة يعني.. ألماني وبرمجة!

تعالى بقى نقولك تعمل إيه لما تتزنق وماتبقاش عارف تسمع نصيحة مين.

لو رجعنا لورا شوية.. في أواخر القرن الـ19.. هنلاقي الفيلسوف الألماني”فريدريك نيتشه” مكلمنا عن الموضوع ده في نظريته “المنظورية – Perspectivism” 

واللي باختصار بتقولك إن مفيش حقيقة مُطلقة.. مفيش حقيقة لمجرد إنها حقيقة وإن كل واحد مننا بيشوف الحاجة أو “المشكلة” من وجهة نظره هو بأسبابه هو.

يعني لو أخدناك انت والاتنين صحابك ووقفناكم حوالين جبل كبير بس كل واحد في حتة.

اللي على اليمين هيشوف الجبل عليه تلج.. واللي على الشمال هيشوف الجبل عليه رمل وصخر.. والتالت لو ركب طيارة وبص من فوق ممكن يشوف بركان.

معلش إرجعوا بقي مكانكم.. وتعالى نشوف الألماني والفرنساوي

صاحبك الفرنساوي وجهة نظره “الصح” إنها لغة مميزة وشيك ونطقها حلو

وده حقيقي فعلًا.. وصاحبك الألماني وجهة نظره إنها منتشرة أكتر وده ممكن يخلي ليها فرص شغل بعد كده أحسن.. وبالمناسبة هو كمان صح.

الفكرة هنا إن كل واحد بص من ناحية الجبل بتاعته هو.. انت كمان ممكن يكون ليك وجهة نظر تالتة خالص وصح برضو.. روسي مثلًا!

طب إحنا ليه بنحب النصائح المُطلقة أصلًا؟

عشان بتريحنا وبتخلينا ناخد القرار بأقل مجهود.. بالذات لو الشخص اللي بينصحنا قريب مننا وواثقين فيه

وعشان تعرف تختار صح فعلًا هتحتاج تعمل الكام حاجة دول:

• حدد “مُحرك” النصيحة

بمعنى أصح.. اللي بيقول كده.. بيقول كده ليه؟ نابع من إيه؟ عشان تفهم بيفكرلها إزاي.

• احسب التكلفة والعائد

“نيتشه” بيقول إنه لكل اختيار فيه تكلفة معينة وعائد معين هيعود عليك.. فا احسبها عشان تعرف مربوحة معاك ولا بلاش أحسن.

• ميكس الاتنين لو تقدر 

إنك تستغل النصيحتين في نفس الوقت.. يعني لو “سنتر الكورسات” عامل أوفر مثلًا وانت عندك وقت.. وماله ما تجرب ياخي.. إنت عندك حاجة تخسرها؟!

في الآخر اختار المناسب ليك.. بتفكيرك انت.. والأحسن لحالتك ووقتك وطاقتك دلوقتي.

أهم حاجة بس صَلَح العربي بتاعك الأول بعدين اختار اللغة اللي تعجبك.