ليه نادرًا لما بنلاقي راجل نقدر نقول عليه “Gentleman”؟

مؤخرا بقينا نشوف بوستات منتشرة على السوشيال ميديا بتنبهر فيها البنات من تصرفات عادية جدا بيعملها الرجالة مع مراتاتهم أو اخواتهم أو اللي بيحبوهم أو حتى صحابهم!.. والتصرفات دي بديهية جدا وطبيعية زي إنهم يخافوا عليهم ويحترموهم.. أو يدعموهم في الأوقات الصعبة أو حتى يمسكوا إيديهم في موقف ما.. بس السؤال هنا ليه بننبهر بالتصرفات دي رغم إنها المفروض تكون الشيء الطبيعي اللي بيحصل في العادي والمفروض تكون موجودة عند كل الرجالة هل ده سببه إن مابقاش في رجالة كتيرة عندها صفات ال gentleman الحقيقي؟..
عشان كده هنقولك في الموضوع ده ليه ده بقى شيء نادر وفقا لموقع medium

في الأول كده خلينا نعرف مين هو الـ gentleman:

من زمان معروف إنه راجل نبيل بمعنى الكلمة.. شخص محافظ على مظهره ولبسه وريحته وبيعامل الستات بأدب واحترام.. وبيساعد أي ست تقع في مشكلة بدون مقابل والرجل النبيل مش لازم يكون مستواه الإجتماعي أو المادي عالي بالعكس هو نبيل بأخلاقه وتربيته.. وده لأنه بيكون شخص بيحترم نفسه فبالتالي بيقدر يحترم الناس ويعاملهم بأخلاق.. وبيكون شخص متواضع مابيحبش يتعالى على حد ولا بيحب يستخدم العنف في تعاملاته..

وبيظهر انتشار الرجال النبلاء في أفلام زمان وهما بيستأذنوا وبيفتحوا باب العربية للبنت عشان تركب وبيتخانقوا عشانها لو حد ضايقها وكمان مابيسيبوش حد يتكلم عنها أو يهزر معاها هزار سخيف..

يمكن أتغيرت الثقافة الخاصة بالنبل واتحول مفهوم الرجل النبيل بإنه راجل ضعيف ومش هيعجب وده بسبب وجود حاجات كتيرة بتشجع الراجل إنه يكون بيتجاهل الست أو يعاملها بقلة قيمة لاعتقاده إنها كده هتعجب بيه وتحبه أكتر أو على طريقة سيد العاطفي لما قال “اكرف البت تحبك.. حب البت تكرفك” وده طبعا حط أفكار غلط عند أجيال بعد كده معتقدين إنهم كل ما هيكونوا الراجل القاسي الغير مهتم كل ما هيلفت نظر البنات ليه اكتر وده طبعا غير صحيح..

عشان كده هنلاقي بهيج في فيلم “طير أنت” بيحاول يبهر حبيبته بإنه شخصيات مختلفة غير شخصيته منهم القوي ومنهم بتاع الجيم والعضلات ولكن مش هتحبه غير لما يكون هو بنفسه على طبيعته لأنه ببساطة كان شخص طبيعي و gentleman

ويمكن كمان بعض الستات كانت جزء من تحول الراجل ده بسبب تصدير فكرة إنها تقدر تعمل كل حاجة لنفسها ومش محتاجة منه يعملها حاجة أو يبذل مجهود فده خلاه يخاف يعمل حاجة أو يخاف من الرفض مع الوقت وكمان الاستقلالية اللي عند المرأة يمكن تبقى وصلت لبعض الرجالة فكرة إنهم مهما عملوا مش هيعرفوا يلفتوا نظرها فبقوا مابيحاولوش أصلا!

ويمكن كمان ده راجع في الأصل إن في جزء كبير من الرجالة مابقاش عارف دوره الحقيقي إيه أو متردد يتعامل بطريقة معينة عشان خايف يتفهم غلط أو يتحرج أو حتى يكون سلوكه مش مقبول مع الست اللي بيتعامل معاها..

بس المهم إننا محتاجين نخلي التصرفات الإنسانية الطبيعية زي احترام الست وتقديرها هو القاعدة الحقيقة مش الاستثناء.. تبقى حاجة كل الرجالة بتعملها مش مجرد شخص أو اتنين .. محتاجين كلنا نرجع لغريزتنا بصفات النبل والأخلاق الحقيقية.