“ماتتجوزوش قبل ماتشتغلوا”.. 12 سبب لكل بنت عشان تشتغل قبل ماتتجوز!
كتب: شحاتة چونيور
“ماتتجوزوش قبل ماتشتغلوا”.. الجملة اللي عملت قلق لما شيرين قالتها كنصيحة وهي في حفل تخرج كلية الطب بأحدى الجامعات بعد ماخلصت غنا.. شيرين حبت تقولها لكل بنت اتخرجت ولسه بتبدأ طريقها في الحياة.
فيه ناس سفت على الموضوع وناس علقت على وزن شيرين الزايد “ودي حاجات مالناش دعوة بيها”.. لكن وقفنا شوية عند نصيحتها وقررنا نشوف ليه فعلاً هي دي نصيحة مهمة وقررنا نقولكوا جزء من الأسباب الكتير اللي تخلي أي بنت لازم تشتغل قبل ماتتجوز:
1- أول حاجة هي إنك هتبقي معتمدة على نفسك مادياً، تحوشي بقى، أو تضيعي فلوسك على حاجات مالهاش لازمة بس ليها لازمة بالنسبالك، أو تجيبي أكتر أكلة بتحبيها، أو تروحي جيم أو تلعبي رياضة تانية، أو تصبغي شعرك نحاسي وبعدها تعيطي.. عادي اللي عايزاه بتعمليه ومش محتاجة فلوس من حد!
2- الشغل قبل الجواز هيخلي عندك أهداف تانية و Life goals وهتحسي بإن ليكي حياتك المستقلة بعيداً عن جوزك والتربية والأولاد، وإنك تقدري لو حابه تبقي أم تكوني أم وزوجة وحاجات تانية كتير جنبها وهيبقى عندك عالم واسع ومؤثر فيكي وفي اللي حواليكي.. وخلي اللي يغير مننا يجي ويعمل زينا.
3- فيه بنات هتقول طب لو اتجوزت واحد غني جداً ممكن أقعد في البيت وماشتغلش؟ هقولك فكري كده شوية هتلاقي ياسمين صبري اتجوزت أحمد أبو هشيمة وفضلت بتشتغل برضو وليها الـ Career الخاص بتاعها!
4- “قاسم أمين” الله يرحمه طلع عينه في مصر هو وناس تانية كتير أكيد عشان الستات تاخد حقوقها في كل جوانب الحياة ومنها إنها تشتغل.. يرضيكي تخذليه؟ لأ.. أنا كمان مايرضينيش!
5- هتبقي فخورة بنفسك ولو الـ Self esteem بتاعك بيجي من شغلك أو دراستك وإنجازك فيها، فشغلك هيساعدك إنه يبقى مصدر دائم لده، وتبقي ملهمة لولادك وبناتك إن مامتهم ست بتشتغل وفي نفس الوقت بتشارك مسئولية بيت وأولاد!
6- هتبقى حاجة من الحاجات اللي هتشاركي فيها جوزك هي ظروف الشغل وخطواتك ومشاكلك فيه، وهتخلق مساحة جميلة من الحوار بينكم بإنه يتكلم عن شغله وإنك تناقشي معاه شغلك وشغله.
7- لو بتشتغلي قبل الجواز هيساعدك تعرفي الـ Red flags بتاعت اللي عايز يتجوزك، لو قالك اقعدي في البيت ماتشتغليش اهربي، اللي عايزك بيقبلك بطموحك وشغلك وهواياتك.
8- في الشغل كل يوم ممكن تتعلمي حاجات جديدة، خبرة أو Task أو مهارة جديدة، ولما بتتعلمي أي حاجة بيفرق معاكي نفسياً وعقلياً.. وأنتي تستحقي إن كل يوم بالنسبالك يبقى فيه إضافة!
9- شربتي من نيلها؟ جربتي تغنيلها؟ طب جربتي تشتغليلها؟ شغلك ده حاجة حلوة لاقتصاد البلد، والإيد الساندة عند الله أفضل من الإيد الساجدة زي ماقالت إيمي تاتو.. ولو قالك عايزه تشتغلي ليه قوليله عشان مصررررر!
10- هيبقى عندك دواير اجتماعية مختلفة، وحياة اجتماعية مش مقتصرة بس على قرايبك وعلى صحابك وصحاب جوزك، وده هيساعدك إنك تبقي شخص أفضل اجتماعياً وعندك مهارات وبتقدري تاخدي قرارات أفضل وربنا يستر.
11- الأميرة ديانا قالت “الناس بتفكر إن الراجل هو الإجابة الوحيدة لمعني الاكتفاء بالنسبة للست، لكن الوظيفة بالنسبة لي إجابة أفضل”.. ودي ديانا اللي كانت بتشتغل وليها إسهامات في المنظمات الحقوقية وليها مواقف أثرت في العالم كله، أينعم حياتها الزوجية كانت تعيسة مع راجل مايستاهلهاش.. بس أهي بعد ماسابته كملت في اللي كانت بتعمله ولا دبلت ولا قبلت تعيش على الرف من بعده!
12- وده يودينا لأخر نقطة عشان لاقدر الله وحصل انفصال يبقى عندك حياتك المستقلة اللي هتبقى الـ Support system بتاعك واللي هتنتشلك من السواد اللي هتبقي فيه لحد ماترجعي متزنة نفسياً تاني وتقدري وقتها تقولي “قومي يابت شوفي شغلك شوفي مصالحك”.. وتقومي فعلاً ومحدش هيقدر يوقفك ياقمر!
وأفتكري دايماً إنك أنتي محور حياتك وإنك بتعملي اللي يريحك ويبسطك ويخلي حياتك أحسن.. سواء حبيتي تشتغلي أو لأ حياتك ليها معنى وقيمة بوجودك فيها ولو الشغل هيخلكي أحسن اشتغلي، الحب هيخليكي مش أحسن فركشي، مفيش كتالوج للسعادة والراحة، بس أنتي اللي بتحددي ده حتي لو كان كتالوجك غريب أو جديد أو مختلف!
