مادة الـ “أسبستوس” خطر جديد في غزة حذرت منه الأمم المتحدة 

الحرب في غزة كان فيها حاجات محرمة دولية كتير وضد الإنسانية من عائلات وأطفال بيموتوا بسبب الحرب أو بيفقدوا أطرافهم أو بيبقوا مفقودين تحت الأنقاض أو بيموتوا بسبب سوء التغذية أو اللي عانوا من أمراض وماينفعش يتعالجوا بسبب عدم وجود مستشفيات، لكن للأسف مش دي كل المشاكل والخطر بس اللي بيعانوا منه أهل غزة.

خبير إزالة المتفجرات في دائرة الأمم المتحدة للأعمال المتعلقة بالألغام (UNMAS) “تشارلز بيرش” قال إن فيه مادة خطيرة بتصعب عملية إزالة الأنقاض في غزة حتى بعد انتهاء الحرب وقال إن الأنقاض وصل حجمها تقريبا لأكتر لـ 37 مليون طن ولازم تتشال من غزة بعد نهاية الحرب 

وصعوبة إنها تتشال بسبب إن فيه قنابل غير متفجرة في الركام ده غير مادة الأسبستوس وده اللي بيعيق إزالتها.. ولكن إيه هي مادة الأسبستوس وإيه مخاطرها وإزاي الشخص يقدر يتجنبها؟

في البداية منظمة الصحة العالمية بتقول إن المادة دي يتعرضلها حوالي 125 مليون شخص في كل العالم في أماكن شغلهم وفيه حوالي 107 ألف شخص بيموتوا كل سنة بسبب سرطان الرئة وورم المتوسطة وداء مادة الأسبستوس بسبب التعرض ليها في أماكن شغلهم

مصطلح الـ”أسبستوس” بيتقال على مجموعة معادن ليفية بتتكون طبيعيا وليها فوايد تجارية بسبب مقاومتها لقوة الشد بشكل مش عادي وإنها مش بتوصل الحرارة كويس وبتقاوم النسبية لهجمات المواد الكيميائية عليها.

ووفقا لوزارة حماية البيئة الإسرائيلية، فالـ “أسبستوس” بيتم استخدامه في البناء وتسقيف المنازل والعوازل الداخلية والخارجية وأنابيب صرف المياه والمداخن والتهوية، وبتدخل ألياف الـ”أسبست” في صناعات كتير زي صناعة غطيان الأبواب المقاومة للحرائق والخزن الفولاذية، وكمان بتم استخدامه في صناعة الملابس الواقية من الحريق وكوابح العربيات وبعض أجزاء العربيات وبيتسخدم كمان مادة عازلة للكابلات والأسلاك واللوحات الكهربائية

ويعتبر كل أشكال الـ”أسبستوس” مواد مسرطنة للبشر وبيسبب أورام وسرطانات زي سرطان الرئة وسرطان الحنجرة وسرطان والمبيض، وداء الـ”أسبستوس” (تليّف الرئتين) ولويحات أغشية الرئتين وحالات التثخّن والانصباب.

منظمة الصحة العالمية كمان تقديراتها بتقول إن تلت الوفيات الناتجة عن أنواع السرطان بتكون بسبب مادة الـ”أسبستوس”، اللي بتحصل بسبب التعرض لعوامل مسرطنة في الشغل وفي البيت كمان.

وزارة البيئة الإسرائيلية كمان بتقول إن من أمراض الـ”أسبستوس” داء الـ”أميانت” أو الـ”أسبستوز”، وهو مرض رئوي تليفي مزمن بيصيب النسيج المتني للرئة نتيجة الاستنشاق والتراكم للـ”أسبست” بكثافة عالية أو لمدة طويلة، وبيكون التعرض للـ”أسبست” في أغلب الأحيان بسبب شغلتهم واللي بيكونوا أما عمال في إنتاجه أو في استخدام المنتج النهائي..

وفي النهاية المادة دي من أخطر المواد على صحة الفرد وجمعية الصحة العالمية أصدرت قرار رقم 58-22 اتكلم عن الوقاية من السرطان وطلبت من الدول الأعضاء اهتمام خاص لأنواع السرطان اللي تعتبر المادة دي من أسبابه، وطلبت الجمعية في قرارها 60-26 من منظمة الصحة العالمية الاضطلاع بحملة عالمية للتخلص من الأمراض اللي ليها علاقة بالأسبستوس.

منظمة الصحة العالمية ومنظمة العمل الدولية والمنظمات الحكومية الدولية ومنظمات المجتمع المدني بيتعونوا مع البلاد عشان التخلص من الأمراض اللي ليها علاقة بالـ”أسبستوس” في إطار توجهات محددة، لكن للأسف مادة  الـ”أسبستوس” هي خطر موجود في غزة دلوقتي.