مراجعة سريعة لـ سيت كوم “الباب فى الباب” تثبتلك إنه الاختيار الأحلى للفرجة وقت الأكل

عارف لما تيجي تاكل في نص اليوم وعاوز تتفرج على حاجة سريعة وتقعد تدور لحد الأكل ما يبرد؟ احنا جبنالك الحل مع سيت كوم “الباب في الباب”.

سيت كوم “الباب فى الباب” إنتاج 2011 وبطولة شريف سلامة.. كارولين خليل.. أحمد خليل.. ليلي طاهر.. هشام إسماعيل.. واللي بيمثلوا الـ 5 شخصيات الأساسية في المسلسل.

المسلسل سريع ومدة الحلقة من 20 لـ 30 دقيقة وهو النسخة المصري من السيت كوم الأمريكي”Everybody Loves Raymond”

السيت كوم بيدور حوالين شريف سلامة أو “هشام” اللي بيشتغل محرر رياضي وإتجوز حبيبته “دينا” من غير ما ياخد رأي مامته وعاش في الشقة اللي قدامها
واللي للأسف ماكنش يعرف إنه القرار ده هيخليه عايش يوميا في تشتيت
ومابيقاش عارف يرضي مين فيهم!

المسلسل عائلي خفيف وقائم على كوميديا المواقف واللي هتشوفها في أي مشهد لـ الأب “خليل فتح الباب” ومشاكله وبخله وعصبيته الغير مبررة مع الأم
“كوثر”.

المسلسل مكون من 3 أجزاء والجزء الأول من إخراج “أسامه العبد” اللي أخرج “تامر وشوقية” و”جوز ماما” و”مسلسلات كوم” .. كل ده يقدر يأكد لك إن اختياره للشخصيات وبالذات “عصام” أخو “هشام” اللي بيعمل دوره الممثل
“هشام إسماعيل” مجاش من فراغ … هتلاحظ كمان خلقه لكوميديا السهل الممتنع حتى في تفاصيل خناقاتهم الطفولية سوا.

حالة “الناقر ونقير” بين شخصيات المسلسل متنفذة بطريقة طبيعية لدرجة  هتشكك إنك عشت خناقة منهم أو شوفتها في حد من قرايبك!

مناوشات “كوثر” و “دينا” اللي باينه من أول مشهد.. التفاصيل الحياتية اللي شبههنا.. اللوكيشن الثابت المريح.. الحدوتة الجديدة مع كل حلقة.. والهزار المصري بالاستايل الامريكى .. الخلطة اللي لو حطينا عليها شوية إفيهات وكوميديا القائمة على المواقف هتطلع لنا “الباب في الباب”.

اسيبك بقا تاكل وتعيش شوية مع عيلة فتح الباب ودوشتهم .. بالهنا والشفا ومشاهدة ممتعة!