مراجعة سريعة لـ سيت كوم “تامر وشوقية” وليه لسة شبه إفيهاتنا لحد دلوقتي؟
عارف ريلز الأنستجرام أو فيديوهات التيك توك اللي بتقعد سهران عليها بالساعات عشان بتعدي في السريع منه؟.. أهو تامر وشوقية مسلسل بيعدي في السريع منه برضه.
سيت كوم “تامر وشوقية” من إخراج أسامة العبد اللي أخرج أول جزئين.. وتغريد العصفوري اللي أخرجت الجزء التالت.. وتأليف عمرو سمير عاطف اللي كمان أشرف على ورشة الكتابة.. واللي عمل حاجات زي: سيت كوم العيادة وجوز ماما وبكار وعالم سمسم وهو نفسه اللي عمل ولاد العم والصياد.. فانت فاهم داخل على عبث حلو إزاي؟
السيت كوم بيبدأ في الحلقة الأولي في أول مشهد بـ أحمد الفيشاوي ومي كساب اللي هم تامر وشوقية وهم في أول يوم جواز.. ومن أول مشهد هتتعرف على الخناقات والمواقف اللي مش مفهومة اللي حصلت في الفرح بين العيلتين.. اللي بالمناسبة مختلفين تمامًا.
عيلة المحامي القدير تامر.. المكونة من رجاء الجداوي “رقية” ولطفي لبيب “عبد الرحمن” وأخته داليا اللي بتعمل دورها “إنجي وجدان”.. العيلة الأرستقراطية اللي بتتعامل بالشوكة والسكينة.
وفي المقابل هتشوف عيلة شوقية المُدرسة في مدرسة حكومة ومامتها “محاسن” وباباها “مُرسي”.. اللي هم إنعام سالوسة وجمال إسماعيل.. والمحبب لقلوبنا جميعًا نضال الشافعي اللي بيعمل دور “سيد” أخو شوقية.
غير الظهور الأول لـ”هيثم دبور” اللي بيقدمه أحمد مكي وشخصيات تانية كتير.
وبالرغم إن “تامر وشوقية” مش أول سيت كوم مصري.. بس نقدر نقول عليه أول سيت كوم يتقابل بالنجاح والشهرة دي بين الناس.. في وقتٍ ما.. أخر كل يوم كانت الناس بتتجمع عشان تشوفهم هيمسكوا في خناق بعض تاني النهاردة ولا إيه؟
والميزة الأساسية في “تامر وشوقية” هي التناقض الرهيب اللي بين العيلتين من غير ما نغلط في حد فيهم.. فكان سيت كوم مُريح للكل ومابيزعلش حد منه.. جاي يضَحك وماشي.
“تامر وشوقية” تصنيفه كوميدي.. وفي دي اتاكد بقى منها لأن انت مش هتلاحق الضحك جايلك منين؟ قعدات تامر وصحابه في الكافيه.. ولا عبثياته مع شوقية.. ولا خناقات سيد وأبوه على الميكروباص.. ولا مشاكل العيلتين اللي مش طايقين بعض.. بص.. هتضحك يعني هتضحك!
كمان “تامر وشوقية” مبني على إفيهات الموقف ومعمول برتم سريع هيحسسك إنه شبه هزارنا بتاع دلوقتي وكإنه لسة بيتعرض حصري.
غير إنه اتعرض في أكتوبر 2006.. وده عزيزي القارئ اللي بعد شوية هتبقى عزيزي المشاهد إن شاء الله معناه إيه؟
معناه إنه عدي عليه 20 سنة.. فماتعديش الذكرى دي كده وقوم خلصلك حلقتين تلاته في السريع.
