مراجعة سريعة لـ مسرحية “رُد قرضي” هتقنعك إنها اختيار مناسب لسهرة العيد
لو زهقت من المسرحيات بتاعت كل عيد وعايز تشوف حاجة حلوة ومختلفة مناسبة للأجواء.. رُد قرضي هتسد معاك!
مسرحية “رُد قرضي” إنتاج سنة 1999 وإخراج هشام جمعة وتأليف حسام عبد البصير.. ومن بطولة أشرف عبد الباقي.. ياسمين عبد العزيز.. شريف منير ومحمد سعد.
المسرحية بتوريك “طُلبة” أو أشرف عبد الباقي الشاب الفقير اللي كل اللي نفسه فيه إنه يتجوز زميلته ياسمين عبد العزيز أو “بسنت” اللي معاه في الجامعة وبيحبها.
هيبانك الموضوع سهل.. أيوه فين المشكلة؟
المشكلة إن بسنت من عيلة أغنى بكتير من طُلبة وعيلته.. ومن حظه الأسود إن “شوكت” أخوها الكبير رجل أعمال مابيكرهش في حياته قد الفقراء وبيحب يعنصر عليهم.. وده اللي بيقوم بدوره “شريف منير”.
على عكس “خلودة” أخوها الصغير الصايع أبو دم خفيف اللي موافق
وماعندوش مشكلة خالص.. أيوه هو اللي بيعمل دوره “محمد سعد”.
المسرحية كوميدية درامية.. وهتلاحظ الدراما اللي هتبدأ تظهر بمجرد ما يطلبوا مهر كبير من “طُلبة” وعشان يقدر يدفعه بيشتغل شغلانات كتيرة وبيحوش فلوسها مع أبوه في البيت.
بس وقت الجد أبوه “الجلدة” البخيل مش بيديله الفلوس وبيلجأ ساعتها طُلبة إنه ياخد القرض اللي هيغير حياته بعد كده.
“رُد قرضي” مسرحية خفيفة وهتحس كإنها لسة بتتعرض ومش قديمة ولا حاجة.
غير الممثلين اللي تقريبًا كلهم هتكون بتحبهم.. ومش هكلمك عن إيفيهات أشرف عبد الباقي هسيبك انت تكتشفها بنفسك.
طبق الكحك.. كوباية الشاي.. جمع عيلتك أو أصحابك.. وسهرة سعيدة ياعم.
