مراجعة سريعة لـ مسلسل “رمضان كريم” هتخليك تعيش معاهم أجواء رمضان اللي بجد!

أكيد سمعت قبل كده ناس بتقول جملة “المسلسلات الواقعية” أو اللي بتعبر عننا وخارجة من الشارع المصري.. رمضان كريم بقى أحسن مثال للجملة دي.

مسلسل “رمضان كريم” للمخرج الراحل سامح عبد العزيز والمؤلف أحمد عبد الله واللي اتعرض في رمضان 2017 ومن بطولة جماعية لـ سيد رجب.. محمود الجندي.. سلوي عثمان.. ريهام عبد الغفور.. روبي وشريف سلامة وأبطال تانية كتير.

المسلسل بيحكي عن يومياتنا في 30 يوم رمضان.. يومياتنا الحقيقية اللي عايشينها بجد في بيوتنا.

فهتلاقي مثلًا ريهام عبد الغفور أو “رضا” بتجهز لفرحها اللي في العيد.. وهتلاقي “الكابتن سامي سوينج” اللي بيقوم بدوره الممثل محمد لطفي بيدرب وبيشرف على الدورة الرمضانية.

هتلاقي المعلم الحناوي صاحب القهوة وهو “بيرص” مائدة الرحمن عشان الناس تفطر.. وهتلاقي حواديت تانية أكتر مابتخلصش في الحارة.

المسلسل تصنيفه دراما – كوميدي ومليان خطوط درامية كتير.. من أول “شريف سلامة” إبن العم اللي نفسه يتجوز بنت عمه “روبي”… لحد المشاكل اليومية اللي بيتعرضلها الاخوات الحاج رمضان والحاج كريم اللي بيقوم بدورهم “سيد رجب” و” محمود الجندي”.

كل شخص في المسلسل عنده حكايه غير التاني هيخليك ماتزهقش منهم أبدًا وتكمل عشان تعرف هو هيعمل إيه بعد كده؟

المسلسل إتعمل منه جزء تاني في 2023 بحكايات جديدة وشخصيات أكتر ولقى نجاح كبير وقتها.. وده خلي فيه خطط لجزء تالت بعد كده.. بس للأسف توقف إنتاجه بسبب وفاة المخرج والمؤلف.

الفوانيس والنور واللمة وجو الحارة الشعبية.. وكل التفاصيل الحلوة بتاعتنا.. هيحسسوك إنك وسط عيلتك وبتفطر معاهم في رمضان.

وبما إن خلاص رمضان قرب وكل سنة وانت طيب.. فا مفيش فرصة أحسن من دي بقى عشان تشوف “رمضان كريم”.