مراجعة سريعة لفيلم “مراتي مدير عام” وليه لسه بنشوفه حتى بعد 60 سنة؟
عارف انت الأفلام الـ Timeless اللي مابتقدمش اللي لما تيجي تتفرج عليها بعد وقت طويل تحس كإنها لسه نازلة السنة دي؟
أهو ده بقى واحد منهم.
فيلم “مراتي مدير عام” إنتاج سنة 1966 ومن بطولة شادية وصلاح ذو الفقار.. وتأليف عبد الحميد جودة السحار وسعد الدين وهبة.. ومن إخراج فطين عبد الوهاب اللي عمل أعمال كوميدية لسة بنحبها لحد دلوقتي زي: إبن حميدو والزوجة 13 وإشاعة حب وحاجات تانية حلوة كتير.
الفيلم بيحكي عن شادية أو “عصمت فهمي” المهندسة وجوزها “حسين” وعلاقتهم اللي في منتهى السعادة والهنا.. وإزاي بتتغير وبتتأثر بترقية “عصمت” لمنصب مدير عام وانتقالها للشغل مع جوزها في نفس شركة الإنشاءات اللي بيشتغل فيها.
كوميدية الفيلم بتبدأ وقت ما “حسين” بيقرر مايقولش إنهم متجوزين ويخلي علاقتهم رسمية.. اعتقادًا منه إنه كده أحسن في إطار الشغل.. بس على عكس المتوقع الموضوع بيسوء أكتر.
الخلافات اللذيذة بينهم في الشغل والبيت.. وإزاي كل واحد بيحاول “يغيظ” التاني في المكان اللي هو مسيطر فيه بيعكسلك الجدال الأزلي بين الرجالة والستات والناقر ونقير.
الفيلم مليان خطوط ضحك كتير.. بدايةً من الوكيل اللي متضايق إن مديرته “ست”.. و”أبو الخير” الموظف المنافق اللي شايف إنها أحسن مدير جه الشركة.. و”أبو المجد” اللي مش عارف يتعامل معاها أصلًا واللي بيقوم بدوره ممثل صاعد وقتها اسمه “عادل إمام”.
الست “شادية” ودلعها وهي بتقول: “رايح فين يا سونا؟” ونرفزة “صلاح” اللي طالعة حقيقية.. ده لأنهم وقتها كانو متجوزين في الحقيقة واللي خلى الكيميا بينهم عالية جدًا وخلى الفيلم طبيعي وقريب للناس.
فا لو زهقان وعايز حاجة خفيفة.. تضحك.. طبيعية.. يبقى مراتي مدير عام أحسن اختيار ليك.
