مرض جدري القرود إيه أعراضه؟ وإيه طرق الوقاية منه!
الفترة اللي فاتت أصدرت منظمة الصحة العالمية تقرير إن تم اكتشاف 4 حالات مصابين بجدري القرود في بريطانيا وامبارح كمان الأربع 18 مايو 2022 أعلنت وكالة أسوشيتدبرس الأمريكية إن ولاية “ماساتشوستس”رصدت إصابة نادرة بمرض جدري القرود لراجل سافر مؤخرا إلى كندا، ولسه لحد دلوقتي مسئولين الصحة بيبحثوا عن إذا كانت إصابته دي مرتبطة بتفشى للمرض فى أوروبا ولا لا!
ده غير إن إسبانيا والبرتغال أعلنوا إنهم سجلوا أكتر من 40 إصابة مؤكدة أو لسه فيهم اشتباه بمرض جدري القردة.
والجدير بالذكر إن مرض جدري القرود وهو مرض متوطّن في غرب إفريقيا وتم اكتشافه لأول مرة في سنة 1958، يعني من حوالي 64 سنة واللي حصل وقتها إن فيه مرض تفشى شبيه بالجدري في مستعمرات اتجمعت فيها قرود، ومن هنا جاء اسم “جدري القرود”.
ينتقل الفيروس للبشر من طوائف مختلفة من الحيوانات البرية، لكن انتشاره من الإنسان للإنسان محدود لحد دلوقتي.. وتم تسجيل أول حالة بشرية من جدري القرود في سنة 1970 في الكونغو وده كان في فترة جهود مكثفة للقضاء على الجدري، وبالرغم من انتشاره في بلاد كتير إلا إن أغلب الإصابات في البلد دي.
ومن وقتها تم الإبلاغ عن جدري القرود في بلاد كتير في وسط وغرب أفريقيا زي الكاميرون، وجمهورية أفريقيا الوسطى، وكوت ديفوار، والكونغو والجابون، وليبيريا، ونيجيريا، وسيراليون، لكن الإصابات بدأت تبقى برا أفريقيا كمان في أمريكا وسنغافورة وبريطانيا بسبب السفر والحيوانات المستوردة.
وأبرز أعراض جدري القرود هي الطفح الجلدي اللي بيظهر في الأول في الوش بعد كده بيتنقل لباقي أجزاء الجسم.. ومن ضمن الأعراض:
1- الحمى
2- الصداع
3- آلام العضلات
4- آلام الظهر
5- الإرهاق
6- تضخم الغدد الليمفاوية
7- قشعريرة
وبمجرد ارتفاع درجة الحرارة بيظهر طفح جلدي بداية من الوش بيتنقل لباقي أجزاء الجسم بس بيكون في أغلب الوقت في كف الإيد وبطن القدم وبتختفي العدوى من غير أي تدخل طبي بعد ما بتستمر الأعراض من 14 لـ21 يوم.
وبالنسبة لانتشار العدوى فأغلب الإصابات بمرض جدري القرود حصلت بسبب:
1- التقاط الفيروس من الحيوانات البرية المصابة في بعض أجزاء أفريقيا زي وسط وغرب أفريقيا لإنه يعتقد إنه بينتشر عن طريق الفيران والسناجب.
2- العض من حيوان مصاب أو لمس دمه أو سوائل جسمه عموما أو البقع والبثور.
3- أكل لحم حيوان مصاب ماتطهرش كويس أو حتى من خلال لمس منتجات تانية من الحيوانات المصابة (زي جلد الحيوان أو فروه).
4- ممكن المرض ينتشر من خلال لمس هدوم شخص مصاب أو من خلال سريره أو فوطه أو جلد الشخص المصاب أو من العطس أوسعال الشخص وده بالرغم إنه مش من المألوف إنه ينتشر من شخص لشخص
وبالنسبة للعلاج من فيروس جدري القرود أغلب الإصابات بالفيروس ده خفيفة وشبه الجدري المائي في أوقات كتير وبتختفي من غير تدخل طبي وفي خلال أسابيع قليلة، ولكن ممكن يتم استخدام الأدوية المضادة للفيروسات والجلوبيولين المناعي (VIG)، وفيه لقاح مضاد لجدري الماء ثبتت فاعليته بنسبة 85% بيتم استخدامه في العلاج في بعض الحالات وهدفه تخفيف الأعراض.. وأحيانا بتكون الإصابة خطيره فعلا، وتم تسجيل وفيات بسبب المرض في غرب أفريقيا.
فيه إجراءات وقائية كتير ممكن الشخص يعملها للحماية من الإصابة بفيروس جدري القرود وهي:
1- بلاش تلمس الحيوانات اللي ممكن يبقى فيها الفيروس أو الميته خصوصا في أماكن انتشار جدري القرود.
2- بلاش تلمس أي حاجة لمست حيوان مريض زي السرير مثلا.
3- عزل المرضى المصابين بيه.
4- اغسل ايديك بعد ما تلمس أي حيوان بالمياه والصابون أو استخدم معقم يد زي الكحول مثلا.
5- كل لحمه مضمونه إنها تبقى نضيفة ومطبوخة كويس.
6- ماتقربش للحيوانات البرية أو الحيوانات الضالة.
