معاناة شعرك مع الرطوبة و 6 خطوات لحل الأزمة

الصيف وارتفاع الرطوبة بشكل كبير، زي ما هو معاناة لينا كأشخاص مش طايقين الحر والتلزيق، هو معاناة كبيرة لشعرنا اللي بيمر بأسوأ حالاته خلال الفترة دي، وده كافي إنه يضيف الاكتئاب والقريفة لمشاعر الفرهدة والخنقة وبيبقى فيه مشاكل من نوعية:

1- إن فجأة شعرك يخرج عن التوقعات، لو بيقعد تلات أو أربع أيام في حالة جيدة مش محتاج يتغسل يفاجئك إنه مش بيستحمل يوم!

2- لو السخونية والمكواة والسشوار بترهقه في العادي بتضطر تلجأ لها لإنقاذ الموقف وخصوصًا لو نفسه مناسبة وبردو النتيجة مش بتكون أحسن حاجة!

3- لو شعرك كيرلي فهتلاقي هيشان في وقت قياسي والكيرليهات داخلة في بعضها وشكل أقرب في تصميمه لسلك المواعين بعد فترة طويلة من الاستخدام.

4- مالوش أمان، لو نازل من البيت بشكل مقبول ممكن توصل في حالة مختلفة خالص بمجرد التعرض للجو برة أو الشمس.

5- صعب حسم أي مخطط أو فرصة للتأنق إنها هتطلع زي المتوقع بنسبة 100% لأن حالة شعرك والجو ممكن تفاجئك يومها.

عشان كده وبناء على ما سبق من مأسويات، جمعنا شوية نصايح كما تم ذكرها في المواقع المتخصصة، لعلها تساهم في إنقاذ الموقف وتخفيف وطأة الكام شهور بتوع الصيف، وذروة أغسطس.

1- الترطيب المستمر

الشعر الجاف أكثر عرضة للتأثر بالرطوبة، لأنه بيشرب الميه بسرعة وبيفضل شكله ناشف، عشان كده استخدام شامبو خاص ومرطبات للشعر الجاف هيفرق.

2- الماء البارد

غسل الشعر بالميه الباردة بعد شطفه من المرطب بيساعد على معالجة نهايات الشعر المتقصفة وإغلاق المسام والحفاظ على الترطيب جواها.

3- تجنب المجفف

بلاش تنشيف الشعر بمجفف -سشوار- خليه ينشف بشكل طبيعي، عن طريق نفض الميه، وفك التشابكات، لأن الحرار هتأدي لإزالة كل الترطيب الموجود في الشعر وبالتالي زيادة سوء حالة الشعر، من ناحية تانية يجب تجنب الخروج إلا بد ما يكون الشعر جاف بشكل كامل.

4- تجنب الغسيل المستمر

أحيانًا حالة الشعر بتبقى سيئة لدرجة بتحتاج إنه يتغسل كل يوم، بس ده مش صح وبيزود المشكلة، لأنه بيضيع كل الدهون الطبيعية الموجودة في فروة الراس، لذلك يكفي غسيل الشعر 3 مرات أسبوعيًا، ولو كان دهني زيادة أو بيحتاج أكتر من كده ممكن تتجهي للشامبو الجاف، وهو مادة جافة بودرة أو سبراي، لتنظيف الشعر بدون ماء، لكن هو مش بديل للشامبو الطبيعي في العموم، لازم بعد حوالي 3 مرات من استخدامه يتم غسل الشعر بالطريقة العادية.

5- النوم على الحرير

استبدلي كسوة المخدة بكسوة حرير، لأنه بيقلل التقصيف وبيساعد على إن الشعر يحافظ على نعومته.

6- استبدلي الفوطة بحاجة قطن

ممكن تستخدمي تيشيرت قطن قديم أو أي حاجة من نفس الخامة بدل الفوطة العادية، وجففي شعرك بيها برفق، ده هيساعد على إنه يحافظ على ترتيبه ويقلل الهيشان.