معايير جمال غير مألوفة حوالين العالم

عادة لما بنسمع كلمة معايير الجمال بيجي في ذهننا شكل محدد من ال stereotype اللي بيعمله المجتمع..بنلاقي نفسنا بنفكر في شكل ووزن وهيئة معينة على الرغم إن مافيش حاجة اسمها معايير جمال ولا حاجة.. وكل واحد بيكون شكله مناسب طول ماهو واثق في نفسه وراضي عنها.. وعشان نأكدلك إن معايير الجمال شيء نسبي جدًا ومختلف من شخص للتاني ومن مجموعة للتانية.. جمعنالكوا في الموضوع ده مجموعة من معايير الجمال الغير مألوفة واللي هتفاجئك وفقًا لموقع ajnet  و موقع العربية


1-الكرش الكبير:
في الوقت اللي بيعمل فيه الشباب فورمة الساحل وبيبقوا مستائين من وزنهم في الصيف.. قبيلة “بودي” في جنوب إثيوبيا بتعتبر إن الكرش الكبير معيار للجاذبية والجمال بالنسبة للرجالة والشباب!.. لا وكمان بيعملوا مهرجان سنوي اسمه مهرجان “كايل” وصاحب أكبر كرش بيلقب بـ “رجل العام” وبتحترمه القبيلة طول العمر.. وعشان توصل للقب ده مش بالساهل كدة بيبقى لازم يعمل نظام غذائي عشان وزنه يزيد لمدة 6 شهور وبينعزلوا خالص وقتها في كوخ لحد ما يوصلوا للتارجت بتاعهم.

ومش بس القبيلة دي اللي بتشوف السمنة جذابة لا كمان وفقًا لموقع العربية
في ثقافة موريتانيا السمنة بتعتبر رمز لجمال وجاذبية الستات وكمان بيبقى حظهم أحلى.

2- العلامات القبلية (ندوب الوجه):

وفقًا لموقع BBC من زمان في نيجيريا بيستعملوا العلامات القبلية اللي بيتم فيها جرح الوش بألة حادة عشان تعبر عن الهوية والقبيلة اللي بينتموا ليها والبعض بيستخدمها كمعيار للجمال والتزيين زي “أكينييمي” اللي حكت قصتها وقالت إن أهلها عملوهالها زمان عشان شايفين إنها علامة من علامات الجمال



وكمان “راماتو” اللي قالت إنها عملت العلامات دي على بوقها عشان من علامات الجمال في قبيلتها

3- دهن الشعر والجسم بالطين الأحمر:
من علامات الجمال اللي بيستخدمها قبيلة الهيمبا في دولة نامبيا هو دهن جسمهم بالطين الأحمر وأكسيد الحديديك لأنهم بيعتبروه من علامات الجمال والست اللي مابتستخدمش الطين الأحمر عندهم بتعتبر مش صحية ومش جميلة وفقًا لموقع komaclub.


4- إستخدام النفايات كـ إكسسوارات:
وفي من القبائل اللي بتصنع من النفايات إكسسوارت وبتعتبرها من علامات الجمال وللتزيين زي قبائل “داساناش” اللي بتعيش في جنوب إثيوبيا.. والستات بيصنعوا الإكسسوارات من غطيان ازايز الحاجة الساقعة أو الساعات القديمة.. وحرفيًا ممكن يعيدوا تدوير أي حاجة بشكل مبتكر.




5- الأسنان المعوجة:
في اليابان طلع من فترة كبيرة تريند واستمر بعدها اسمه “yaeba” ومعناه السن المزدوج يعني اللي راكب فوق بعضه.. وبيتعمل عملية تجميل -من وجهة نظرهم -عشان يوصلوا للشكل ده  وكانوا بيعتبروه علامة على الشباب والجمال الطبيعي.



6- الأسنان الحادة:
وبمناسبة إننا جبنا سيرة السنان في تقاليد قبيلة مينتاواي في إندونيسيا.. بيعتبروا أن المرأة الناضجة بتكون جميلة لو كانت أسنانها حادة ومدببة.. وكمان بيعتقدوا إن  طقوس برد السنان هتجبلهم السعادة والسلام.. وفقًا لموقع indoindians



ده غير إن نفس القبيلة كمان بيخرموا ودانهم ويحطوا فيه حلقان دهب كل سنة كنوع من الجمال وكمان بيرمز لسنهم.. وبيعتقدوا إن كل ما زاد طول شحمة ودانهم كل ما زاد جمالهم



وفي الأخر بنفكرك إن مفيش مقياس محدد للجمال وكل واحد بيشوفه ويحدده من خلال بيئته وثقافته وميولة الشخصية وكمان تأثيرات المجتمع عليه.. وعلى رأي المثل الإنجليزي “The standard of beauty is not definite. We define it”
يعني من الأخر احنا اللي بنحدد معايير الجمال فمانخليش حد تاني يحددهالنا!

فافتكر إنك تحب نفسك زي ما هي عشان زي ما أنت شايف كدة الجمال مالوش كتالوج.