“معدة السكريات”.. دراسة بتشرح ليه مابنقدرش نقاوم الحلويات بعد الأكل حتى وإحنا شبعانين

بعد ما الواحد يكون واكل أكلة كبيرة وتقيلة ومش قادر يتحرك.. أغلب الناس دايمًا بيلاقوا مكان في بطنهم للحلويات بعد الأكل.

والباحثين ممكن يكونوا لقوا السبب اللي بيخلينا نلاقي صعوبة في مقاومة الحلويات بعد الأكل.

وحسب دراسة جديدة.. فيه عملية بتحصل في المخ بتخلينا نحس بالشبع بعد الأكل.. لكنها في نفس الوقت بتخلينا نبقى عايزين ناكل سكريات.

والتجربة حصلت على فيران.. كلوا لحد ما شبعوا وماقدروش ياكلوا أي لقمة كمان لما قدمولهم نفس الأكل مرة تانية.. لكن لما عرضوا عليهم حاجات مسكرة بدل الوجبة.. كلوا أكتر بـ6 مرات عن العادي.. والمخ بتاعهم اشتغل بشكل مكثف.

أما عند البشر، فلما كلوا حاجات مسكرة.. حصل نفس النشاط في المخ.. وظهر إن مجموعة خلايا عصبية اسمها POMC neurons كانت شغالة بقوة.. وتجارب تانية على الفيران بينت إنه لو النشاط ده في المخ اتعطل.. الفيران ماحتاجوش ياكلوا سكريات وهم شبعانين.

الدكتور المؤلف الرئيسي للدراسة من معهد “ماكس بلانك” قال:
“أنا زي ناس كتير.. بلاقي صعوبة في إني أقول لا لو قدامي حلويات.. الموضوع ممكن يكون صعب جدًا.. وده منطقي من الناحية التطورية.. لأن السكر بيدينا طاقة سريعة.. وكان وجوده نادر في الطبيعة.. فالمخ بتاعنا مبرمج إنه ياخده أول ما يلاقيه”.

في التجربة اللي حصلت على الفيران.. أكلوا أكلهم المعتاد اللي فيه بس 3% سكر لمدة 90 دقيقة.. وبعد كده عرضوا عليها يا إما نفس الأكل.. أو  سكريات لذيذة فيها 35% سكر.. والنتيجة؟ الفيران مش بس أكلوا من الحلو أكتر بكتير.. لكن في نفس الوقت الخلايا العصبية POMC طلّعت الإندورفينات اللي بتخلي الواحد يحس بالسعادة.. وده خلى السكر مغري أكتر بالنسبالهم للأكل.

وحتى مجرد النظر لحاجة مليانة سكر كان بيحفّز المخ بنفس الطريقة.. زي لما تشوف طبق حلو قدامك وفجأة تحس بالجوع تاني! والغريب إن الفيران كانت بتحس بالسعادة ناحية الحلويات حتى قبل ما يشوفوها.. زي الرغبة اللي بتحس بيها لما تشوف منيو الحلويات.

زي الفيران بالضبط نشاط المخ بتاع الإنسان بيّن إن الخلايا العصبية كانت بتستقبل الإندورفينات.. وده بيقلل الإحساس بالشبع.. فبالتالي الواحد مابيحسش بالشبع ناحية الحلويات بالذات أو إنه مش قادر ياكل الحلو.

لكن الدراسة بتقول إن النشاط ده كله ممكن يقف.. وفي المستقبل ممكن يبقى فيه أدوية بتستهدف تحديدًا المنطقة الصغيرة المسؤولة عن الرغبة في السكر بعد الأكل من غير ما تأثر على باقي المخ وتسبب أعراض جانبية.

طب إيه الخطوة الجاية؟ 

العلماء والباحثين ناويين يراقبوا نشاط المخ عند البشر وهم بياكلوا حلو بعد الأكل عشان يتعلموا أكتر عن أساليب السيطرة على الرغبة في السكريات.. عشان حسب الدراسة: “حب الحلويات هو واحد من أسباب الأكل بشراهة والسمنة وعشان كده لازم نفهمه أكتر”.