مع تغير الجو.. ليه بتحس إنك مخنوق وحالتك النفسية مش كويسة وإزاي تحل ده؟

مع موجات الحر والعواصف الترابية اللي بتعدي علينا الأيام دي بتبدأ تحس إن خلقك ابتدى يضيق وأعصابك مش مستحملة كلام كتير ة والأجواء حواليك مشحونة توتر وقلق؟

ماتقلقش انت مش لوحدك.. في دراسة اتعملت على 48 ألف شخص من كوريا الجنوبية كان هدفها إنهم يعرفوا.. هل في علاقة بين مشاكل الجيوب الأنفية وأمراض زي الإكتئاب والقلق؟
والنتايج كانت مفاجأة..

ده لأنهم لقوا إن أكتر من 50% من المشاركين في الدراسة وعندهم التهاب جيوب أنفية مزمن كانوا متعرضين أكتر إنهم يصابوا بالإكتئاب مقارنة بالناس اللي ماعندهاش المشكلة دي.. كمان كانوا متعرضين إنهم يصابوا بالقلق بنسبة 57% أكتر من غيرهم..

وده لأن تقلب الجو وزيادة درجة الحرارة بيعملوا التهاب في الأغشية المخاطية المبطنة للجيوب الأنفية.. وده بيسبب صعوبة في التنفس وصداع مستمر وبيرفع الضغط..

المشكلة الحقيقية بتبقى في قلة الأكسجين.. لأن صعوبة التنفس معناها أكسجين أقل داخل للمخ وبالتالي مخك يبدأ يحس بعدم ارتياح وده بيزود من القلق والتوتر والإكتئاب..

وعشان التنفس له تأثير كبير على صحتك النفسية زي ما شوفنا.. في دراسة تانية اتعملت عن طريقة “التنفس الحجابي” وإزاي الطريقة دي بتساعد الإنسان يتنفس بشكل أحسن وبالتالي تحسن من نفسيته.. بس إيه هو التنفس الحجابي أصلًا؟

التنفس الحجابي هو عملية تنفس بتتم من خلال عضلة الحجاب الحاجز.. بنستخدم فيها العضلة دي عشان تسحب الهواء للرئتين بشكل أعمق وأهدى بدل من التنفس السريع اللي بيحصل من خلال الصدر..

طريقة التنفس الحجابي شبه تمارين اليوجا شوية.. إنك بتقعد أو بتمدد في مكان هادي.. تحط إيدك على صدرك والإيد التانية على بطنك وتاخد نفس عميق لمدة 4 ثواني.. احبس النفس بهدوء لمدة ثانيتين أو تلاتة.. طلع النفس ببطء من بؤك من 6-8 ثواني.. وكررر التمرين ده لمدة 5-10 دقايق يوميًا..

الموضوع ممكن يبقى صعب في الأول بس مع التكرار هتتعود عليه وهتلاقي تأثيرها ظهر عليك في تقليل التوتر والقلق وتهدئة الجهاز العصبي وتحسين المزاج والتركيز..

عارفين إن الجو صعب ويخنق بس معلش اعمل اللي عليك وحاول تلاقي حل وزق الأيام.