السينما في مصر هي أقدم صناعة في أفريقيا والوطن العربي وكانت دايمًا هي اللي بتحتضن الفن – حتى لو ده بان إنه كليشيه.. بس هو حقيقي- وعشان كده هتلاقي عدى على السينما المصرية أشكال وألوان.. فيهم اللي اتنسى وفيهم اللي اتحفر في دماغنا ومهما عدت أجيال هتلاقي أساميهم لسه معروفة.. فالنهاردة قولنا نتكلم على الفنانات بالأخص واللي يستاهلوا لقب “ست الكل”

سعاد حسني 

الست الكُمل.. استعراضات ماشي.. غنا ماشي.. تمثيل ماشي.. هتلاقيها عارفة تمثل كوميدي وتراجيدي وتتبسط في الاتنين.. لو شوفتها في صغيرة على الحب هتصدق إنها البنت الصغيرة والست الكبيرة ولو شوفتها في المشبوه هتصدق إنها الست الشقيانة ولو شوفتها في أي دور هتصدقها بكل سهولة

ميرفت أمين

لو اتفرجت على “البحث عن فضيحة” هتشوفها فتاة أحلامك البنت الجميلة الشقية.. ولو مسكت الريموت وحولت على “زوجة رجل مهم” هتعرف إن يتقال عليها ست الكل.. الست كانت راضية وساكتة لحد ما الدنيا باظت خالص.. ووقفت جنب جوزها في ضعفة وفقره وكمان الحرب لحد ما وصل لأعلى مكانة في الدولة في فيلم “أيام السادات” ودي حاجة متعملهاش غير ست الكل.. وطبعًا دورها في أفلام زي “سواق الأتوبيس” و”أيام السادات” و”دائرة الانتقام” 

نبيلة عبيد

لو ماشوفتش “الراقصة والسياسي” أو “كشف المستور”.. ودورها العظيم في “رابعة العدوية”.. فياريت تتفرج عليهم وبعدين تكمل قراية.. عشان قبل ما تشوفهم حاجة وبعد ما هتشوفهم هتبقى حاجة تانية خالص وهتعرف ليه نبيلة عبيد تستاهل تتحط هنا

نادية لطفي

ست مثقفة وليها مواقف.. وده بان في مواقفها وقت غزو إسرائيل للبنان لما سافرت لبنان تقف مع المقاومة أو مواقفها تجاه القضية الفلسطينية.. ده غير طبعًا أفلامها زي “المومياء” وخفة دمها في “للرجال فقط” وتمثيلها في “لا تطفئ الشمس”

هدى سلطان

من الفنانات اللي كملوا وفضلوا موجودين على الشاشة في مختلف الأدوار والأعمار.. من فيلم “الأسطي حسن” و”جعلوني مجرمًا” لـ “عودة الإبن الضال” ومسلسل “أرابيسك” .. وفي كل مرة كانت بتثبت إنها تقدر تفضل عايشة على مر الزمن

عبلة كامل

لو عايز تشوف عبلة كامل كأنك أول مرة تشوفها.. اتفرج على فيلم “مرسيدس” و”هستيريا” وبعد كده شوفها في “لن أعيش في جلباب أبي” وبعدين “إمرأة في زمن الحب” وهتعرف إنها ست كل الأدوار بجد

نجلاء فتحي

من الممثلات اللي أفلامها ناقشت قضايا ومواضيع مهمة.. زي فيلم “عفوًا أيها القانون” ولو بتحب السينما الواقعية.. فهيعجبك دورها في “أحلام هند وكاميليا” ده غير دور “شهرزاد” في مسلسل “ألف ليلة وليلة”

طبعًا دول مش كل الفنانات اللي أثروا وكان ليهم دور في السينما المصرية.. بس دول منهم.. قولولنا مين تاني شايفين لازم يكون في اللستة.