ليه بنأجل الحاجات اللي المفروض نعملها.. وإزاي ده بيأثر على نفسيتنا وإيه حل المشكلة دي؟

فاكر كام مرة عملت Save لأفلام نفسك تشوفها ولسه لحد دلوقتي ماشوفتهاش؟ طب كام مرة قولت إنك عايز تنزل الجيم أو تبدأ تتعلم لغة جديدة أو زنقت نفسك لحد الديدلاين وماكنتش لسه بدأت في الشغل أصلًا؟ كتير صح؟

ده بقى اللي بيسموه التسويف.. إنك تقول هبقى أعملها.. ومابتعملش ولا حاجة.. طب ليه التسويف بيحسسك بالضغط؟

في 1927 طلع مصطلح اسمه “تأثير زيجارنيك – Zeigarnik Effect” المصطلح ده بيوصف حالة الضغط النفسي اللي بتسببها لك التاسكات والحاجات اللي انت مأجلها.. وده لأن عقلك بيفضل يفكرك بيها من وقت للتاني وده بيخليك مضغوط وحاسس إنك مقصر طول الوقت 

كتر التسويف وتأجيل الحاجات بيسبب لك قلق وده بيخليك تأجل حاجات أكتر وتضغط نفسك أكتر.. ده بيسموه “دورات التسويف” وفيها العلماء قسموا التسويف لمراحل وكل مرحلة ليها سبب وبتعمل فيها حاجة مختلفة عشان تأجل اللي انت المفروض تعمله فعلًا.. ومنها: 

1- الخوف من الفشل: 

فيها الشخص بيبدأ يأجل يعمل اللي وراه عشان خايف لما يخلصه يطلع وحش ومايجيبش النتايج اللي هو متخيلها فا بيفضل يأجل.. والتأجيل يعمل ضغط وقلق وخوف أكتر وهكذا..

2- السعي للكمال:

بتأجل عشان مستني الوقت المناسب والأدوات المناسبة والظروف المناسبة اللي غالبًا مش بتيجي وبتخليك تفضل تأجل أكتر 

3- المشاعر السلبية:

ساعات بتسوف لأن عندك مشاعر سلبية مش قادر تسيطر عليها.. بتعاني من اكتئاب.. شاكك في نفسك ومش متأكد من امكانياتك.. وبتبدأ تلوم نفسك كتير ومابيبقاش عندك تعاطف تجاه نفسك.. وبتفضل تلف في الدايرة دي وده بيزود المشكلة الأساسية اللي هي التسويف 

4- الدنيا تلاهي: 

الحياة بقت سريعة ومليانة حاجات بتجري ورا إنها تاخد انتباهك.. أهمها الانترنت والسوشيال ميديا.. دورة التسويف عالنت دي بتبدأ بـ “نوتيفيكيشن” عشوائية من جروب أو أبليكيشن وهوب تلاقي نفسك ضيعت ساعتين مش عارف ف إيه وأجلت اللي كنت المفروض بتعمله

أسباب التسويف كتير ومختلفة بس كلها بتودي لسكة واحدة.. قلق وتوتر وضغط أكبر.. وفي دراسات كتير اتعملت على الموضوع ده ولقوا إن التسويف بيبقى له تأثير سلبي على الجسم والعقل

طب خلاص كده مفيش حل؟ أكيد لأ.. دي شوية حاجات ممكن تساعدك تتغلب على التسويف: 

1- أرجوك.. ابدأ:

مهما كان اللي المفروض تعمله.. ابدأ فيه واعمل أي حاجة.. لأن الوقت المناسب مش هيجي والظروف الملائمة هتفضل تتأخر وكمان انت نفسك هتفضل تتشغل ويتراكم عليك حاجات زيادة

2- قسمها.. تسهلها:

التاسكات بتبقى أسهل لما تتقسم لحاجات صغيرة.. ده بيحسسك إنك بتنجز وبيدي لعقلك دافع إنه يكمل من غير زهق

3- حاول تنظم حياتك عامة:

التنظيم بيساعدك تنجز التاسكات بشكل أسرع.. إنك تدي لكل حاجة وقت ومكان في يومك وعادي لو ماخلصتهاش في الوقت ده ماتتسحلش معاها كل ده بيزود انتاجيتك

4- انت كويس.. ماتقولش غير كده:

بطّل تقول كلام قاسي لنفسك لو مانجزتش اللي المفروض تنجزه.. مشاعرك السلبية بتأثر على انتاجيتك وده بيدخلك في الدايرة المفرغة بتاعة التأجيل أكتر وأكتر

وفي النهاية لو وصلت لهنا فانت شاطر ومأجلتش القراءة ليوم تاني ولا عملت لـ اللينك Save وتقدر تعتبر دي أول خطوة إنك بقيت شخص غير مسوف بنجاح.