من خلال الدراسات.. إيه الأسباب اللي بتخلي العلاقات العاطفية تستمر وتبقى أقوى؟
بمناسبة إن النهاردة الفلانتين.. فـ لو انت مرتبط أو حتى سينجل.. أكيد فكرت قبل كده في السؤال الوجودي بتاع “إيه الأسباب اللي بتخلي العلاقات العاطفية تكمل وتستمر وتبقى أقوى؟”
يعني أكيد عدى عليك ناس متجوزين بقالهم 10 و15 و20 سنة وأكتر.. وغالبا بيجيلهم سؤال: “إيه الوصفة السحرية اللي بسببها انتوا مكملين؟” في وسط معدلات طلاق كتير حوالينا وناس متجوزين بيتطلقوا بعد سنة ويمكن كام شهر.. فإيه السبب بقى اللي بيخلي العلاقات العاطفية والجوازات تستمر؟ وإيه سر العلاقة الطويلة والسعيدة؟
والأسباب دي على فكرة مش معقدة ولا صعبة.. هي ببساطة إنكوا مثلا تتفرجوا على التلفزيون سوا.. أو تخرجوا مع بعض من وقت للتاني.. إن يبقى عندكوا حس فكاهي مشترك.. أو إنكوا تبقوا متونسين ببعض وانتوا ساكتين.. وقبل كل ده إنكوا تبقى صحاب.
في استطلاع رأي لأزواج بقالهم مع بعض أكتر من 10 سنين في بريطانيا لقوا إن الصداقة هي العنصر اللي معظم الأزواج اتفقوا عليه كعامل أساسي لاستمرار العلاقة.. وده كان بنسبة 80%.
وفي المركز التاني كان الوفاء.. بنسبة 58% من الأزواج شايفينه عامل مهم.. وبعده على طول إن يبقى فيه حس فكاهي مشترك بينهم بنسبة 51%.
وبنسبة 41% من الأزواج اللي كانوا في الاستطلاع اعتبروا إن الإخلاص أو عدم الخيانة عنصر مهم في العلاقة.. ونفس النسبة شافوا إن الفرجة على التلفزيون مع بعض برضه حاجة مؤثرة.
وعلى غير المتوقع.. العلاقة الحميمية جت بنسبة منخفضة شوية.. ونسبة 35% شافوا إنها ضرورية لعلاقة حب تدوم لفترة طويلة.
وكمان “الهزار بس من غير تجريح” بنسبة 33% كان من ضمن أهم 10 أسرار لعلاقة طويلة.. والطبخ مع بعض بنسبة 27%.. والهوايات المشتركة بنسبة 21%.
والاستطلاع كمان قال إن أكتر من نص الأزواج بنسبة 56% كانوا شايفين إن “الشغف” في العلاقة حاجة مبالغ فيها.
وفي استطلاع تاني في 2023 شمل 2000 زوج وزوجة في علاقات طويلة.. 43% منهم قالوا إن السر في استمرار العلاقات ونجاحها هو إن “مفيش أسرار بين الاتنين”.. و31% منهم نصحوا إن مفيش نوم قبل حل أي خلاف أو مشكلة بينهم.
ودراسة تانية تابعت 2500 زوج وزوجة على مدار 6 سنين.. لقوا إن السن والعلاقات السابقة وعادات التدخين.. كلها كانت عوامل بتحدد إذا كانت العلاقة هتكمل ولا لا.
ومجموعة باحثين في أستراليا لقوا إن فرص الطلاق بتتضاعف لما يكون الزوج أكبر من زوجته بحوالي 9 سنين.. ونفس الكلام لو الزوج اتجوز قبل ما يتم 25 سنة.. أما الحاجات اللي ماكانتش مؤثرة في استمرار العلاقة.. فكانت البلد اللي اتولدوا فيها.. والخلفية الدينية.. والمستوى التعليمي.
وأخيرا.. هابي فلانتين لكل المرتبطين.. وكل الاحترام والحب للسناجل لو قرأوا كل ده ووصلوا لهنا مع إن الموضوع مايهمهش.
