مواهب إفريقية تستحق تتابعها في كأس الأمم الإفريقية 2025

كأس أمم إفريقيا عمرها ما كانت بطولة عادية وخلاص دي دايمًا كانت بوابة كبيرة لأي لعيب عايز يقفز خطوة لقدام بطولة ضغطها عالي وكله عين على كله واللي يثبت نفسه فيها بيطلع باسم تقيل وسعره يطلع في السما وكتير من نجوم إفريقيا الحقيقيين كانت بطولتهم الفارقة هي أمم إفريقيا

وفي نسخة 2025 الموضوع أكبر شوية لأن الأنظار مش بس على النجوم المعروفين لكن كمان على جيل شاب داخل وهو عارف إن الفرصة دي ممكن تغيّر حياته الكروية كلها ماتشين تلاتة حلوين ممكن ينقلوه من نادي متوسط لنادي تقيل في أوروبا

والنسخة دي مليانة مواهب صاعدة لاعيبة صغيرة في السن بس بيلعبوا في أعلى مستويات أوروبا بعضهم أساسي وبعضهم واخد فرصة وبيستغلها صح.. و”الكان” بالنسبة لهم مش بطولة وخلاص دي امتحان حقيقي قدام العالم كله

نوح.. هدوء رغم السن

نوح ساديكي لعيب ارتكاز من الكونغو الديمقراطية عنده 21 سنة بس بيلعب كأنه لعيب خبرة ووجوده مع سندرلاند في الدوري الإنجليزي خلّاه يتعود على الضغط واللعب السريع وده باين جدًا في هدوءه وتمركزه

والكونغو منتخب طموح جدًا في البطولة ولو ساديكي بان بمستواه الطبيعي أندية كتير في إنجلترا وأوروبا هتحط اسمه في النوتة

ونوح لعب الموسم ده 16 ماتش بواقع 1416 دقيقة وقيمته السوقية حوالي 25 مليون دولار

بنجامين.. ظهير متكامل 

نيجيريا دايمًا عندها لعيبة شباب بس بنجامين فريدريك شكله مختلف.. والولد عنده 20 سنة بيلعب ظهير أيمن وقلب دفاع ونجح بسرعة في أول إعارة ليه في بلجيكا

والأهم إنه بقى أساسي في آخر 4 ماتشات لنيجيريا وده معناه إن الجهاز الفني شايف فيه حاجة كبيرة.. وكمان هو لعيب منضبط بيعرف يدافع ويطلع قدام وقت اللزوم

شارك في 15 ماتش مع فريقه لعب فيهم 981 دقيقة وقيمته السوقية 800 ألف دولار بس وده رقم قابل للانفجار

شمس.. الجناح الطاير

طالبي واحد من أكتر الأسماء اللي لفتت الانتباه في إنجلترا

لعيب صغير بس سجل قدام ليفربول وتشيلسي وجاب نقاط مهمة لسندرلاند

وبيلعب جناح يمين وشمال وسريع وجرئ ومش بيخاف من المواجهات.. ومع منتخب المغرب صاحب الأرض والجمهور الفرصة قدامه دهب عشان ينفجر قاريًا ويثبت نفسه

وشارك الموسم ده في 16 ماتش سجل 2 وصنع 2 وقيمته السوقية 22 مليون دولار

كامارا.. موتور السنغال

لامين كامارا مش مجرد لاعب وسط بيلم كرات

ده موتور لعب حقيقي بيفهم الكورة وبيتحرك صح وبيني الهجمة من تحت وبقاله موسم ونص أساسي مع موناكو وده لوحده خبرة كبيرة ووجوده مهم جدًا لمنتخب السنغال اللي دايمًا بيعتمد على وسط ملعب قوي

لعب الموسم ده 12 ماتش وصنع 3 أهداف وقيمته السوقية وصلت لـ 33 مليون يورو

إبراهيم مازا.. اختيار القلب

قصة مازا مختلفة.. لاعب مولود في ألمانيا وكان قدامه أكتر من اختيار لكنه اختار الجزائر وهو لسه صغير ودلوقتي عنده 20 سنة وبقى واحد من ألمع مواهب ليفركوزن وبيلعب صانع لعب أو مهاجم تاني وبيتميز بالذكاء والقرار السريع

لو بان في البطولة دي ممكن يطلع منها لعيب مختلف تمامًا وشارك في 21 ماتش في البوندزليجا وساهم في 7 أهداف وقيمته السوقية 25 مليون يورو

مباي.. جوهرة باريس

السنغال كمان معاها مفاجأة اسمها إبراهيم مباي

ولد عنده 17 سنة بيلعب في باريس سان جيرمان وخد فرصته بسبب الإصابات ونجح يخطف العين بسرعة

ولعب 22 ماتش سجل هدف وصنع 3 وقدر يقنع الجهاز الفني للسنغال يضمه لقائمة الكان ولو خد فرصة حقيقية ممكن يبقى واحد من قصص البطولة

قيمته السوقية 25 مليون يورو وهو لسه في أول الطريق

ديوماندي.. أوروبا مستنياه

جناح كوت ديفوار الصغير يان ديوماندي عنده 19 سنة وانتقل للايبزيج مقابل 23 مليون دولار ومن أول ما وصل وهو حديث الصحافة الألمانية

ولعيب سريع وذكي وأرقامه قوية جدًا وساهم في 11 هدف من 16 ماتش سجل 7 وصنع 4 وكمان اسمه بيتربط بدري بأندية زي ليفربول ومانشستر سيتي وتشيلسي وده يوضح قد إيه موهبته ملفتة

ودول كانوا شوية مواهب تقدر تتابعهم في كأس أمم إفريقيا 2025 اللي شغالة دلوقتي ..البطولة مش بس سباق على الكاس دي محطة مصيرية لجيل كامل من المواهب الإفريقية وأسامي كتير ممكن تطلع من البطولة دي لعيبة نجوم وأسعارهم تضرب واللي هيعرف يستغل اللحظة هو اللي هيكتب قصته الحقيقية قدام العالم كله.. وده اللي كلنا هنشوفه الفترة الجاية.