موضوع مايهمكش: إيه هو “Undertone” البشرة وإزاي تعرفيه؟
لحد إمتى هنفضل لما نشوف بلوزة حلوة على واحدة من صاحباتنا
ونروح نجيب زيها بالظبط ونفس اللون تطلع علينا وحشة ومبهَتانا؟
طب عمرك سألتي نفسك ليه لون الطرحة اللى طالع
“تريند” ده والناس كلها بتلبسه مش لايق عليكي؟
في أسباب كتير للموضوع ده.. بس من أهمهم حاجة إسمها Skin Undertone
يعني إيه Skin Undertone ؟
ببساطة هو الدرجة التحتية للبشرة أو نقدر نقول عليه هو اللون “الخفي” الموجود تحت سطح جلدك على طول.
طب إيه الفرق بينه وبين لون البشرة العادي بتاعنا؟
لون بشرتك الخارجي سواء فاتح.. قمحي.. غامق… ممكن يتغير بسبب الشمس أو الحبوب أو أي نوع من التصبغات لكن الـ Undertone ثابت مابيتغيرش أبدًا.
ليه هو مهم؟
الـ Undertone هو اللى بيحدد إيه الألوان اللى بتليق عليكي في اللبس أو الدرجات المناسبة ليكي في الميك اب… حتى لون صبغة الشعر أو الطرحة اللى هينورو وشك.
الـ Undertone له 3 أنواع أساسية:
- بارد (Cool) وده بيخلي البشرة مايلة للون البينك.. الأحمر أو الأزرق
- دافي (Warm) وهنا بتكون البشرة مايلة للون الدهبي أو الأصفر وساعات الخوخي.
- محايد (Neutral) ده بيبقي بين الاتنين لما بيكون لون البشرة ملوش Undertone واضح.
وعشان تعرفي الـ Undertone بتاع بشرتك ممكن تعملي حاجة من دول:
- إختبار العروق
بصي على عروق إيدك من عند المعصم.. لو لونها أزرق أو بنفسجي يبقى الـ Undertone بتاعك “بارد” أما لو لقيتيها لونها أخضر شوية يبقى دافى.
- إختبار المجوهرات
جربي حلق أو سلسلة لونهم دهبي.. لو وشك نور أكتر وحسيتي بلمعة يبقي انتي Undertone وشك دافي.
لكن لو غمقك أكتر أو حسيتي إن الفضي هو اللي منورك يبقي من غير شك الـ Undertone بتاعك بارد.
لو الدهبي والفضي تأثيرهم زي بعض عليكي يبقي انتي “محايد” وهيليق عليكي أي حاجة.. يابختك ياستي.
- إختبار الورقة البيضاء
حطي ورقة بيضة جنب وشك وبصي في المراية.. لو وشك بان لونه أصفر أو باهت يبقى انتي دافى.. لو بان لونه وردي أو محمر يبقى العكس.
- إختبار الألوان
تقدري تجربي ألوان مختلفة عليكي وتصوري نفسك وتقارني تأثير الألوان دي:
لو الـ Undertone بتاعك بارد هيليق عليكي البنفسجي والأزرقات والبينك
أما لو الـ Undertone بتاعك دافي يبقي خليكي في الأصفر والبرتقالي والأحمرات
فا مثلًا:
وانتي بتشتري الـ Foundation الجديد بتاعك.. هتحتاجي تجيبيه علي أصفر مش بينك عشان “مايجيرش” ويقلب رمادي لو انتي الـ Undertone بتاعك دافي.
أو لما تجيبي إكسسوارات تاني وانتي Undertone بارد هتحتاجي تجيبيها “فضي” مش دهبي.. عشان تنورك وماتبهتكيش!
وبس ياستي هو ده الـ Skin Undertone فا المرة الجاية بقى وانتي بتلفي على الهدوم مع صاحبتك ماتختريش نفس لون البلوزة بتاعتها.. وإختاري اللى هيليق عليكي انتي.
