موضوع مايهمكش: اعرف شخصيتك من لون شرابك

بما إننا دخلنا في الخريف وكلنا الأيام دي مانستغناش عن شرابتنا.. حابين نقولك إن شراباتنا مش بس بتدفينا وتحتوينا لا.. اختيارتنا لشراباتنا بتقول كتير عن شخصيتنا كمان عشان كده في الموضوع ده هنقولك كل لون بيقول إيه عنك وفقًا لموقع theuglysocks وموقع baucemag

1-الشراب الأبيض:
بيقول إنك شخص بيحب العملية والبساطة ومابتحبش وجع الدماغ وبيدل إنك شخص سهل التعامل معاه ومش بتاع حوارات.. ويا سلام بقى لو بتلبس الشراب الأبيض وفيه ألوان أو رسومات يبقى إنت كده شخص مبدع ومميز في حياتك.

2-الشراب الأسود:
بيقول إنك شخص كلاسيك وبتحب تبقى formal وشخصيتك فيها حزم كدة وغالبًا بتكون واثق في نفسك وشخص راقي في تعاملاتك.. بس لو حبيت تلبس الشراب الأسود عليه ألوان أو تصميمات غريبة يبقى في جزء من شخصيتك مداريه بس
دمه خفيف.

3-الشراب الرمادي:
بيقول إنك شخص متوازن في حياتك وبتحب الاستقرار
وغالبًا شخص عملي وبتحب النظام ومالكش في البهدلة.

4-الشراب الأزرق:
بيقول إنك شخص صادق وعلى طبيعته والناس بتثق فيه بسرعة..
وإنك كمان شخص هادي وميكس كده جميل مضروب في الخلاط مميز ما بين الرسمية والعملية.

5-الشراب الأصفر:
بيقول إنك شخص مبهج ومتفائل وبتحب تنشر الإيجابية حواليك..
وكمان بيقول إنك شخص مختلف ومميز والحاجات الصغيرة بتفرحك!.

6-الشراب البني:
بيقول إنك شخص واقعي أوي ومسؤول ومالكش في الدلع..
وبيدي للناس انطباع إنك شخص ملتزم بكلامه وعلى وضعه.

7-الشراب الأحمر:
بيدل على إنك شخص منفتح وواثق من نفسه  وبيحب يكون مركز الاهتمام
في أي مكان وملهم كدة للي حواليه وبينبهروا بيه .

8-الشرابات المنقوشة:
الشرابات المنقوشة بتدل على انك شخص جريء وبتميل للمخاطرة وتجربة حاجات جديدة من غير خوف.. وكمان بتقول إنك شخص فنان وعندك حتة إبداع شايلها للحبايب.. ابسط ياعم.

شوفت بقى إن الموضوع طلع كبير مش مجرد شراب وخلاص فخلي بالك بقى وإنت بتنقي شرابك إنه يكون فعًلا بيعبر عنك.. وحيث كده
قولنا بقى إنت أنهي شخصية في دول؟