موضوع مايهمكش: حاجات ماتعرفهاش عن الشاليموه 

أكيد كلنا شربنا عصير بست وإحنا صغيرين أو كبار بالشاليموه وماكناش عارفين ندخله ولما بقى فيه اختراع العصير بالشاليموه المعلب المتطور أكتر اتبسطنا أكتر بالموضوع وعجبنا.. ولما بنخرج ونشرب عصير برا غالبا بيبقى بشاليموه برضه والموضوع اتطور معانا لدرجة إن المجات الإزاز اللي بيتشرب فيها الآيس كوفي والماتشا دلوقتي بقى فيها شاليموه إزاز وبيغرينا عشان نشتري المجات دي.

وفي يوم الشاليموه.. تعالى نقولك على شوية حاجات وحقايق ماتعرفهاش عنه حسب ما قال موقع “packman” وموقع “ukvending”:

1- أقدم شاليموه كان غالي جدًا:

أول شاليموه معروف لقوه في مقبرة سومرية وبيرجع لسنة 3000 قبل الميلاد، وكان مصنوع من الدهب وحجر اللازورد الكريم.

2- فيه شاليموه متعدد الاستخدامات:

في الأرجنتينيين بيستخدموا شاليموه معدني خاص اسمه “بومبيا” عشان يصفي وبيشربوا بيه شاي المتة.

3- الشاليموه مطلوب جدًا:

في أمريكا بس بيتم استخدام حوالي 500 مليون شاليموه كل يوم.

4- الشاليموه البلاستيك بيضر الحياة البحرية:

الشاليموه البلاستيك بيساهم في تلوث البلاستيك حول العالم وبيضيع بيئات بحرية كتير.

5- إعادة تدوير الشاليموه لصناعة شنط:

في أوغندا بيتم إعادة تدوير الشاليموه، والمواد بتاعته بتتنسج عشان يتعمل بيها شنط.

6- الإنتاج الضخم للشاليموه:

أول شاليموه تم إنتاجه بكميات كبيرة اخترعه “مارفن ستون” سنة 1888 وعمله عن طريق لف ورق حوالين قلم، وبعدين غطاه بالشمع عشان مايبوشش.

7- الشاليموه في الفضاء:

رواد الفضاء بيستخدموا شاليموه مخصوص عشان يشربوا السوائل في الجاذبية المنعدمة.. والشاليموه فيه صمامات عشان تمنع السائل من الطفو.

8- شعبية الشاليموه في الوجبات السريعة:

الشاليموه بقى مشهور جدًا مع انتشار المطاعم السريعة والمشروبات الغازية، خصوصًا في نص القرن العشرين مع ظهور ماكينات الصودا.

9- أطول شاليموه في العالم:

أطول سلسلة شاليموه في العالم حسب موسوعة جينيس اتعملت سنة 2015، وكان مكون من 44,146 شاليموه، وطوله وصل لأكتر من 2,158 متر.