موضوع مايهمكش: في يومه العالمي.. اعرف شخصيتك من طريقة أكلك للبيض

البيض دايما موجود بشكل ما في حياتنا.. سواء في الفطار أو في بعض الوجبات والحلويات.. أو كبروتين بعد الجيم والتمرين.. أو كأكلة سريعة لو جعانين ومش لاقيين حاجة نعملها بسرعة.. وأنواع طبخ البيض كتير وكل حد بيحب ياكله بطريقة معينة وفيه حد ممكن يكون بيحب كذا طريقة أو كذا نوع.. بس غالبا فيه طريقة واحدة ممكن تكون بتحبها أكتر من الباقيين. 

وزي حاجات كتير في حياتنا حتى اختيارك لطريقة أكل البيض ممكن يعكس جوانب معينة من شخصيتك.. وكل نوع من البيض ممكن يمثل شخصية مختلفة وبيكشف عن سمات وطباع خاصة في طريقة حياتك وتعاملك مع الدنيا.

 تعالوا نشوف إيه اللي ممكن نعرفه عن شخصيتك من طريقة أكلك للبيض حسب مواقع مختلفة زي The Breakfast Shoppe – The Kitchn – Nature’s Basket – Owlcation – LittleThings 

البيض المسلوق – Hard-Boiled Eggs:

لو بتحب البيض المسلوق فغالبا شخصيتك مش منظمة أوي وممكن تكون عشوائية ومش ملتزمة.. شخص عملي وصريح وعندك ميول إنك تبقى شخص مستقل.. بتتحرك بسرعة في حياتك وبتكوّن آراء بسرعة عن كل حاجة.. وغالبا مش فارق معاك رأي الناس فيك وده بيديك حرية أكبر في تصرفاتك لكن في نفس الوقت بتسعى للحفاظ على لياقتك ومظهرك لنفسك مش للناس.. وممكن تكون شوية صعب التعامل معاك في الأول بس لما حد بيعرفك كويس بيعرف إن قلبك طيب وحنين.

البيض المسلوق نص سوا “البرشت” – Soft-Boiled Eggs:

لو بتحب البيض المسلوق نص سوا اللي اسمه “برشت” وغالبا بيتحط في كوباية خاصة بيه ويتاكل بالمعلقة.. فغالبا انت بتستمتع بالحاجات البسيطة في الحياة.. يعني لقطات ومواقف بسيطة ممكن تبسطك.. شخص حساس لكن في نفس الوقت عندك معايير عالية في التعامل مع نفسك ومع الناس.. ذوقك عامة عالي وفيه شياكة كبيرة.. وبتقدّر التفاصيل الصغيرة اللي بتخلي كل حاجة أحسن.. وبالرغم إنك شخص هادي بس بتكون شديد جدا في بعض المواقف لكن مش بتجرح مشاعر الناس بسهولة.

البيض المقلي – Fried Eggs:

لو بتحب البيض المقلي فغالبا انت منفتح أكتر على التجارب الجديدة.. مبدع وعندك فضول وخيال واسع.. مميز في شغلك وغالبا بتشتغل في وظايف بتحتاج مهارات معينة.. ممكن تاخد وقت عشان تتعود على الناس اللي حواليك أو يتعودوا عليك لكن لما بيعرفوك كويس بيحبوك.

البيض المخفوق – Scrambled Eggs:

لو بتحب البيض يبقى Scrambled غالبا انت شخص عملي.. وبتحب الاستقرار والروتين في حياتك.. بتقدّر البساطة لكن مش هتضحي بالمتعة والانبساط على حسابها.. بتحاول حياتك تبقى مترتبة ومنظمة.. وعندك ولاء لصحابك.. وغالبا بتحب تبني علاقات تعيش العمر كله.. وبالرغم من كل ده عندك جانب كده من اللامبالاة في أي حاجة متعلقة بالقواعد والقيود.. وشخص عايش الحياة بالطريقة اللي بتحبها ومن غير ما تهتم كتير بتوقعات الناس منك أو عنك.

وجدعنة مننا كده الصفات دي ممكن تمشي برضه مع اللي بيحبوا البيض بالبسطرمة أو البيض بالشيدر أو البيض بالعجوة.. بما إن كله Scrambled 

البيض الأومليت – Omelette Eggs:

لو بتحب الأومليت فده ممكن يكون مؤشر إنك شخص منظم.. وبتحب كل حاجة تبقى بتترتب على طريقتك انت.. صاحب مخلص وعندك ولاء وبتحب تساعد الناس.. بس مش أي حد يبقى صاحبك لأنك بتختار صحابك باهتمام ومش بترضى بأي حاجة.. وعندك شجاعة وحب للمغامرة.. غالبا مش بتحب تعمل نفس الحاجة كل مرة وبتستمتع بتجربة حاجات جديدة ومختلفة.. بتحاول تعيش الحياة لأقصى درجة ودايما بتحاول تعيش تجارب جديدة ومختلفة.

البيض العيون – Sunny Side Up Eggs:

لو بتحب البيض العيون.. فغالبا انت شخص متفائل وبتحب الحياة.. بتعيش حياتك ببهجة.. وبتكوّن صداقات بسرعة وعندك مجموعة كبيرة من الصحاب اللي بتحبهم وبيحبوك بس بتحافظ على اللي بيضيف قيمة لحياتك واللي انت برضه بتضيفله.. بتبقى صريح بخصوص مشاعرك.. وشخصيتك فيها مزيج بين الجانب الهادي والجانب العفوي.. وبتحب تعمل توازن في حياتك بين انك تستمتع باللحظات الصغيرة وتدور على مغامرات جديدة.. غالبا انت شخص بيسعى للمثالية في كل حاجة وعارف هو عايز إيه وعندك أهداف طموحة بتسعى وراها طول الوقت.

قولنا بقى انت بتحب نوع إيه من طرق طبخ البيض؟ والكلام ده صح بنسبة كام %؟