موضوع مايهمكش: في يومه العالمي.. قصة “الكعب العالي” إمتى اخترعوه وتطوراته؟

مين فينا وهي صغيرة عينها مكانتش بتطلع قلوب على هيلز سندريلا اللي خلتها تقابل الأمير.. كنا ندخل دولاب ماما ونخرج الكعب العالي ونلبسه ويبقى واسع بس كنا نحس قد إيه إننا برنسيس عشان هو رمز  للأنوثة والأناقة.. ده كان من الحاجات اللي كنا عاوزين نكبر عشانها.. بس إمتى أصلًا الكعب العالي ده ظهر في الحياة؟

حسب مواقع fashion-era و fastcompany و londonrunway

بداية استخدامه

الروايات عن الكعب العالي كتير ومختلفة.. فمثلًا فيه روايات بتقول إن بدايته كانت في مصر القديمة يعني من حوالي 3500 سنة قبل الميلاد.. بس مش الستات اللي كانوا بيلبسوها.. ولسه كنا بنقول إن الكعب العالي رمز الأنوثة.. أهو عندهم بقى كان رمز للغنى يعني لو حد لمحك وانت لابسه ساعتها هيشوفوك من أبناء الطبقة العليا أما لو ماشي حافي فانت فقير

 وفيه رواية تانية مختلفة في التاريخ لكن تقريبًا متفقة على السبب بتقول إن بداية الكعب العالي كانت في بلاد فارس في القرن العاشر الميلادي وكان برضه مصمم للرجالة الأغنياء.. الفرسان كانوا بيستخدموه عشان  يديهم طول ويثبت رجلهم ويسهل حركتهم فوق الحصان

ظهوره في أوروبا

لما العيلة المالكة الفارسية سافرت للبلاط الفرنسي تقريبًا في القرن الـ ١٧ الميلادي.. نقلوا الموضة دي لأوروبا.. ولو فاكر إن خلاص الستات هي اللي هتلبسه بقى كده فانت غلطان لأنه برضه انتشر بين الرجالة في البلاط الأوروبي

والشخصيات المشهورة بحبها للكعب العالي كان الملك لويس الـ 14 اللي كان بيحب يلبس هيلز نعلها لونه أحمر واللي في رواية من الروايات بتحكي إنه عمل كعب طوله 10 سم عشان بس يكون طويل وهيبته تزيد في البلد.. واللي ساعتها أصدر مرسوم بيقول إن النبلاء من الطبقة الغنية بس اللي يلبسوا كعب 

طب إمتى الكعب العالي بقى للستات؟ 

تقريبًا في أواخر القرن الـ 17 الستات أخيرًا بدأت تلبس كعب عالي بس في القرن الـ 18 ومع قرب الثورة الفرنسية كده اتغيرت نظرة الناس للكعب العالي خالص.. والرجالة رجعوا لوعيهم ومابقوش يلبسوا كعب عالي وبقوا يلبسوا جذم فلات واتحرروا من فكرة ارتباطهم بالملك بتاعهم.. وفي القرن الـ 19 أخيرًا بقى الكعب العالي رمز للأنوثة بس عشان بقى للستات بس.. وده عشان مفاهيم عصر التنوير حسب ما قالت كبيرة أمناء متحف باتا للأحذية وإن كمان الناس بقوا بيشوفوا الكعب العالي إنه رمز أنثوي 

وفي الآخر سواء كنتي بترتاحي في الكعب العالي أو بيوجعلك ضهرك.. هو هيفضل قطعة مهمة وليه دور كبير في إنه ياخد الأوتفت لحتة تانية.. وهيخرج منك الأميرة اللي جواكي.. أينعم برنسيس برجل مرهقة بس المهم إنك برنسيس ياختي