موضوع مايهمكش: ملخص روبوتات إيلون ماسك الجديدة

يوم 10 أكتوبر اللي فات، شركة تسلا قدمت إيفينت اسمه “We, Robot” واللي إيلون ماسك كشف فيه عن 3 تكنولوجيات جديدة هتغير شكل النقل والروبوتات المنزلية بشكل كامل.. إحنا بقى لخصنالك كل الحوارات دي 

والحاجات اللي قدموها لحد دلوقتي هي:

1. Cybercab 
2. Robovan
3. Optimus Robot

سايبر كاب (Cybercab): 

العربية بتسوق بنفسها بشكل كامل.. مفيش دركسيون ولا دواسات.. بتقدر تشحنها عن بعد.. وممكن كمان تنضف نفسها بنفسها وده بيوفر عليك أي مجهود.. والعربيات دي أصحابها ممكن يكسبوا منها فلوس ويسيبوها تشتغل عن طريق إنها تنقل الناس.. فتبقى زي وسيلة مواصلات بتدخل فلوس لأصحابها ومن غير ما حد يسوقها.. وإيلون ماسك قال إن السايبر كاب هتخلي فكرة السواقة زي استخدام الأسانسير.. حاجة روتينية وكل حاجة فيها بتشتغل بشكل تلقائي.. ومتوقع يبدأ إنتاجها قبل سنة 2027.

وطبعا العربية دي حل مثالي للناس اللي هتبقى عايزة تريح حبتين وتنام وتسيب العربية توصلهم.. وفي جميع الحالات هتخليك تفعل وضعية “لن أبذل أي مجهود” عشان انت حرفيا مش هتعمل فيها أي حاجة.

روبوفان (Robovan): 

وفي نفس الإيفينت.. إيلون ماسك قدم “روبوفان”.. اللي هي عبارة عن وسيلة نقل بتسوق بنفسها لمجموعات كبيرة.. والعربية دي بتقدر تشيل لحد 20 راكب وبتخدم النقل الجماعي وممكن تبقى زي أتوبيس مدرسي وممكن كمان تستخدم في الشحن ونقل البضايع.

متوقع إنها تشتغل بتكلفة ما بين 5 لـ 10 سنت لكل ميل.. ولسه الشركة منتظرة الموافقة القانونية على التشغيل الذاتي الكامل ليها.. وإيلون ماسك قال إن عربيات زي الروبوفان هتقلل من تكلفة النقل وهتغير شكل المواصلات العامة في العالم.

يعني باختصار مفيش لموا الأجرة مع بعض يا حضرات.. مفيش الكرسيين اللي جنب السواق محجوزين.. مفيش مندوب شحن هيفضل يتصل بيك من 8 الصبح ومايجيش في الآخر.. مفيش مشرفة الباص نسيت تتصل بيكي عشان تنزلي ولادك.. وحل عصري لمشكلة تظبيط عربية توصلك انت وصحابك لو عايزين تسافروا. 

روبوت أوبتيموس (Optimus Robot): 

وأكتر روبوت حصل عليه قلق والناس اتكلمت عنه كان روبوت “أوبتيموس” اللي إيلون ماسك قال إنه هيكون موجود في البيوت والشركات والمصانع كمساعد شخصي.. والروبوت ده بيقدر يعمل مهام يومية كتير زي إنه ياخد باله من الأطفال.. ينضف.. يطبخ.. يرفع حاجات تقيلة.. يجيبلك حاجات معينة انت عايزها.. بيتحرك زي الإنسان وبيعملك أي طلبات فيها مجهود بدني في البيت أو حتى في مكان الشغل.. والروبوت ده متوقع يبقى جاهز قبل 2025.

وطبعا الروبوت ده طالع بكذا دور.. فهو طباخ وعامل نظافة وأوفيس بوي وأسيستانت وسكرتير ودليفري.. وحاجة كده ربنا يكتبها علينا.

لو وصلت لحد هنا.. فنحب نقولك إن سعر عربية Cybercab حوالي 30000 دولار.. وسعر روبوت Optimus بين 20000 و 30000 دولار.. فكمل يومك عادي عشان الكلام ده مش لينا يا عبده