موضوع مايهمكش: هل الليمون فعلا بيروّق الأعصاب؟ وإيه السر ورا “شجرة واتنين لمون”؟

الليمون من الفواكه اللي ليها استخدامات كتير في حياتنا اليومية، سواء في الأكل أو المشروبات.. وعصير الليمون من أشهر المشروبات المنعشة في الصيف أو الشتاء.. وفيه ناس بتحب تضيفه للمياه والعصاير عشان يديلها طعم مختلف.. ديتوكس بقا أو كوكتيلات أو طعم مزز في المشروبات.. وكمان بيدخل في أكلات كتير زي السلطات والمخللات والشوربة.. وناس كتير بتحطه على أكلات مختلفة ومابيحسوش بطعم الأكل غير بيه.. وبيستخدم كمان في تنظيف وتطهير البيت.. ومع كل الفوايد دي، الليمون معروف بإنه بيهدّي الأعصاب وبيساعد على تقليل التوتر.. ومن ناحية تانية، في أوقات بيبقى رمز للهزار بين الناس، خصوصا لما الموضوع يكون فيه رومانسية أو حب أو تلزيق.

الليمون معروف إنه بيساعد على تهدئة الأعصاب وتقليل التوتر.. وناس كتير بتشربه كعصير لما يكونوا متوترين أو عصبيين.. وتلاقي ناس كتير بتقول لبعض لما يكونوا متعصبين: “اشرب لمون عشان تروق”.. والكلام ده أحيانا مش هزار، لأنه مبني على تأثير فعلي لليمون في تهدئة الأعصاب.

حسب موقع Eco Happiness Project.. الليمون بيساعد على تقليل ضغط الدم وتخفيف التوتر والقلق وبيخلينا نحس بالهدوء بشكل عام.

وده لأن فيه نسبة كويسة من فيتامين سي (تقريبا زي البرتقان)، واللي معروف إنه بيقلل من مستويات هرمونات التوتر.

 الدراسات أثبتت إن فيتامين سي بيحمي خلايا المخ من التلف بسبب هرمون التوتر “الكورتيزول”.. وفيه دراسة لقت إن فيتامين سي ساعد الناس إنهم يتغلبوا على المواقف المسببة للتوتر بسهولة أكتر.. في الدراسة دي ضغط الدم ومستويات الكورتيزول رجعوا للمعدل الطبيعي بسرعة أكتر لما الناس خدت فيتامين سي قبل الموقف اللي سبب لهم توتر. 

التوتر كمان بيخلي جسمنا يفرز “جزيئات حرة” أكتر من لما نكون في حالة مزاجية كويسة.. فيتامين سي بقا بيساعد في التحكم في الجزيئات الحرة دي في الجسم.. يعني بشكل عام هو بيحمي الجسم من التأثيرات المتراكمة للتوتر.

طب إيه موضوع “شجرة واتنين لمون”؟ وإيه علاقة الليمون بالرومانسية؟

“شجرة واتنين لمون” هي جملة مصرية بتتقال دايما من باب الهزار والتلقيح لما يكون فيه اتنين مرتبطين أو بيحبوا بعض.. وبتستخدم لما الاتنين دول يبدأوا يبقوا “ملزقين” أو فيه رومانسية مبالغ فيها وهم مع ناس تانية.. فتلاقي حد بيقولهم “تحبوا أجيبلكوا شجرة واتنين لمون؟”

الفكرة بقا إن الموضوع طلع أكبر شوية من الهزار ومن تلزيق الكابلز.

حسب موقع Aura Health.. الحب دايما بيتوصف إنه زي الملاهي.. مليان مشاعر متقلبة من فرحة وحماس وأحيانا ألم.. وبنفس الطريقة الليمون بيعبر عن ازدواجية مميزة.. لونه الأصفر بيمثل السعادة والتفاؤل.. وطعمه الحامض بيمثل التحديات والصعوبات.

لو فاكر إن الكلام ده أوفر شوية.. فالموقع قدم تحليل إن الحب زي الليمون.. ممكن يكون طعمه حلو بس في نفس الوقت مزز.. فهو عامل زي توازن بين لحظات السعادة ووجع القلب.. زي ما طعم الليمون المزز بيخليك تكرمش وشك كده.. علاقات الحب برضه أحيانا بتحصل فيها مشاكل وخناقات تخليك تكرمش وشك.. علاقة بتبقى شبه كأنك بتاكل ليمونة زي ما هي كده.. وعلاقة تانية بتبقى عاملة زي عصير ليمون ساقع بالسكر والنعناع.. فمن الآخر، هو تشبيه ما بين الحب والليمون في التباين ما بين الحلاوة والمزازة.

وبيفضل سؤال كده في الآخر.. الليمون عمل إيه عشان يدخل في الحوارات دي كلها؟