موضوع مايهمكش: هل تفاحة واحدة في اليوم ممكن تبعدك عن الدكتور فعلًا؟

أكيد في مرة عدى عليك المقولة اللي بتقول “تفاحة واحدة في اليوم تبعدك عن الدكتور” – “One apple a day keeps the doctor away”.. ويوم 16 سبتمبر كمان هو “اليوم العالمي إنك تاكل تفاحة” وبالمناسبة دي قررنا ندور على فوايد التفاح وهل هو فعلا بيحسن الصحة للدرجة اللي تحميك إنك ماتروحش لدكتور؟

موقع Healthline بيقول إن المقولة دي اتقالت لأول مرة سنة 1913، وأول حد نشر الاقتباس الأصلي كانت مجلة “Notes and Queries” لما كتبوا: “كُل تفاحة قبل النوم، وهتمنع الدكتور إنه يكسب” – 

“Eat an apple on going to bed, and you’ll keep the doctor from earning his bread.”

موقع Healthline كمان قال إن مفيش أبحاث كتير بتتكلم عن إن أكل تفاح كتير ممكن يرتبط بعدد زيارات أقل للدكتور، لكن التفاح عامة بيساعد في تحسين جوانب كتير في صحة الإنسان.

التفاح فيه عناصر غذائية مهمة، زي الألياف والفيتامينات والمعادن ومضادات الأكسدة، ودراسات كتير قالت إن أكل تفاح أكتر ممكن يرتبط بتقليل خطر الإصابة بحالات مزمنة كتير زي أمراض القلب مثلا. 

وفي دراسة اتعملت على أكتر من 20 ألف شخص أكلوا كميات أكبر من الفواكه والخضروات بما فيها التفاح، لقوا إنهم معرضين أقل للإصابة بالسكتة الدماغية.

التفاح كمان مليان “ألياف قابلة للذوبان” ودي اللي بتساعد على خفض ضغط الدم وخفض مستويات الكولسترول، وده اللي بيقلل من الإصابة بأمراض القلب.

التفاح كمان ارتبط بفوايد صحية تانية كتير ممكن تحميك من الدكتور:

• بيساعد على فقدان الوزن: التفاح بيزود من شعور الشبع عشان فيه ألياف كتير، وبالتالي تقليل تناول السعرات الحرارية، فبيساعد على فقدان الوزن لو زودته في نظامك الغذائي.

• التفاح بيساعد في تحسين صحة العظام: دراسات بشرية وحيوانية ومختبرية قالت إن التفاح والفواكه عامة ممكن ترتبط بزيادة كثافة المعادن العظمية وتقليل خطر الإصابة بهشاشة العظام.

• التفاح بيحسن وظايف الدماغ: دراسات اتعملت عن التفاح وأثبتت إنه بيساعد في تقليل التوتر، والوقاية من التدهور العقلي، وتباطؤ علامات الشيخوخة.

• التفاح بيحمي من الربو: بعض الدراسات قالت إن أكل التفاح ممكن يقلل خطر الإصابة بالربو.

• تقليل خطر الإصابة بالسكري: دراسات كتير قالت إن أكل تفاحة واحدة في اليوم ممكن بنسبة 28% يقلل خطر الإصابة بالسكري من النوع 2 مقارنة بعدم أكل التفاح خالص.

طبعا كل اللي فات ده بشرى سارة جدا لمحبي التفاح، ولو أنت مابتحبش التفاح فإحنا مش عارفين أنت كملت قراءة الموضوع ليه بس كده كده فيه فواكه وخضار كتير فيهم مجموعة من العناصر الغذائية المهمة والفوايد الصحية زي التفاح، فعادي لو مابتحبش التفاح.