موضوع مايهمكش: 10 حاجات ماتعرفهاش عن الروج
جملة أسماء جلال “Lip Gloss foreveeeer” بتمثل كل البنات ومابتفرقش في السن بينهم، مهما كانت البنت مضغوطة أو نازلة نزولة سريعة أو متضايقة أو كويسة أو راحة مناسبة وممكن لو قاعدة في البيت ساعات تلاقيها بتحط روج ومن وقت ما بتبقى طفلة أهم حاجة عندها ممكن تلعب بيها في ميك أب مامتها هي الروج.
وخلال الحرب العالمية التانية بالرغم إن الموارد كانت قليلة جدا بس ارتفعت مبيعات الروج بشكل كبير وحتى أثناء كورونا في سنة 2020 الناس كانت بتلبس كمامات بس برضه البنات بيجيبوا روج وفي شهر مايو 2021 شبكة CNN قالت إن مبيعات الروج في أمريكا زادت بنسبة 80% في عام 2021
ودي حاجة اسمها “Lipstick Effect” ودي بتبقى ظاهرة معروفة إن لما الناس بيواجهوا أزمة اقتصادية بيشتروا سلع فاخرة صغيرة زي الروج كده عشان يحسوا بالرضا.
وبمناسبة إن النهاردة يوم الروج.. قررنا نقولك شوية حقايق ماتهمش أي حد خالص عن الروج حسب ما قال موقع “witness” وموقع “librelondon” بس تبقي شوية معلومات عندك تعرفيها وأنتي بتستخدميه:
1- الروج بيتم استخدامه من آلاف السنين، وبيرجع تاريخه لحوالي 2500 قبل الميلاد من بلاد بالشرق الأوسط.. واتوثق بإن الملكة بتحط لون روج مصنوع من الحجارة المطحونة
2- استخدم الفراعنة بما فيهم كليوباترا الروج اللي لونه قريب من اللون الأحمر.. وكان بيعتقد إن كليوباترا ربطت استخدام الروج بالقوة
3- في مصر القديمة كان الرجال والنساء بيحطوا روج كرمز للمكانة، لكن في اليونان القديمة
فكرة الروج اترفضت من الطبقات العليا وخصصوه للأعمال المنافية للأداب عشان يقدروا الرجالة يتعرفوا عليهم.
4- الروج كان منتشر في روما القديمة بين الستات والرجالة وكان بيحتوى على مكونات سامة زي الرصاص وخام الحديد وتركيز من نوع الطحالب ليها تأثير ضار على الصحة.
5- بعض المكونات الأولى اللي كانت بتستخدم في صنع الروج كانت الدهون الحيوانية ونخاع الثور وشمع العسل والأحجار الكريمة المحونة.
6- تم تطوير أول روج بيثبت كتير في العالم على إيد كيميائية اسمها “هازل بيشوب” اللي ابتكرت التركيبة أثناء ما كانت بتشتغل في معمل طبيب الأمراض الجلدية بعد الحرب العالمية التانية.
7- ظهر أول روج دوار في أنبوبة سنة 1923
8- الدراسات بتقول إت الستات بيصرفوا متوسط 1780 دولار على الروج طول عمرهم
9- الروج الأحمر دايما مرتبط إنه اللون الشبابي أكتر لإنه لون بيبقى متناقض وصارخ مع جميع أنواع البشرة وده اللي بيربطه بفكرة الشباب.
10- الروج الماسي من H Couture Beauty هو أغلى روج في العالم وسعره 14 مليون دولار لإن العلبة مصنوعة من دهب عيار 18 ومرصعة بحوالي 200 ماسة
