موضوع مايهمكش: 10 حاجات ماتعرفهاش عن وحيد القرن 

وحيد القرن هو تاني أكبر حيوان ثديي على الأرض زي الفيل كده، ومن أكتر الحيوانات العدوانية وبالرغم من سمعته إنه بلطجي جدا وعدواني بس هو معرض للانقراض وده بسبب إن البشر اصطادوهم كتير في القرن اللي فات.. وبمناسبة اليوم العالمي لوحيد القرن خلينا نقولك شوية معلومات ممكن ماتكونش عارفها عنه حسب ما قال موقع “mental floss”:

1- يونانيون على الأقل في اسمهم:

كلمة وحيد القرن مشتقة من الكلمتين اليونانيتين “Rhino” واللي هي (مناخير) و”Keras” واللي هو (قرن). عشان كده لما بنختصر الكلمة بالانجليزي وبتقول “Rhino” اللي هي”وحيد القرن” ، فإحنا بنقول “مناخير” فقط.

2- طولهم كان حوالي 16 قدم:

كان فيه نوع اسمه “باراسيراتيريوم” وده  نوع من وحيد القرن القديم وكان من غير قرون وكان موجود على الأرض قبل 30 مليون سنة، وكان طوله أكتر من 16 قدم.. وحيد القرن الجديد أصغر في الحجم أكيد لكن العلماء مش عارفين اتطور كده إزاي! وحيد القرن الأبيض طوله حوالي 6 قدم، وهو الأكبر من بين الأنواع الخمسة الموجودة دلوقتي واللي طول أصغرهم أقل من 5 قدم واللي هو وحيد القرن “السومطري” وهو النوع الوحيد المشعر.

3- وحيد القرن الأبيض والأسود لونهم زي بعض في الواقع:

في الأساس لون النوعين رمادي-بني، وفيه اشاعه بتقول إن المستوطنين الهولنديين في إفريقيا أطلقوا على وحيد القرن الأبيض اسم wijd  واللي هي يعني “واسع” بالألماني وده عشان بوقه واسع ، وبعد كده تم ترجمتها غلط في الإنجليزي واتقال إنه أبيض، ومع ذلك  قال خبير وحيد القرن “كيس روكماكر” إنه مافيش أي دليل لغوي بيدعم الحكاية دي فبقيت لغز وحيد القرن الأبيض اتسمى كده إزاي!

4- عندهم علاقة غريبة مع طائر الـ “الاوكسبيكر”:

طائر “الاوكسبيكر” أو نقار التيران فيه علاقة غريبة بينه وبين وحيد القرن هتلاقيه أغلب الوقت فوق ضهره وماشيه معاه، والحجة التقليدية هي إنها بتتغذى على الحشرات والقراد اللي على جلد وحيد القرن.

5- ذكور وحيد القرن عدوانيين أكتر:

وحيد القرن بيستخدم قرونه لو الموضوع له علاقة بقلبه وعواطفه، ويعتبر ذكور وحيد القرن الأسود عدوانيين بشكل خاص لإن وهما بيدوروا على شريكة، معدل الخناقات المميتة بين العشاق اللي عندهم قرون دول أعلى من أي حيوان ثديي تاني على الكوكب، وبيموت حوالي نص الذكور و30% من الإناث متأثرين بجروح  اتصابوا بيها في الخناقات دي.

6- مرتبطين بالحمار الوحشي:

أقرب الكائنات الحية لوحيد القرن مش الفيلة ولا سيد قشطة لكن الحصينة والحمير الوحشية، وده لإن كلهم متصنفين إنهم بيمشوا على حوافر فردية الأصابع، ووحيد القرن بيمشي على 3 صوابع بس.

7- رجلهم حساسة جدا:

وحيد القرن عنده نقطة ضعف واحدة اللي هي رجله، وعادة ما بيحط وحيد القرن معظم وزنه على ضوافر صوابع رجله وهو ماشي عشان يتجنب إجهاد رجله الحساسة، وسهل يعمل كده في البرية عشان فيه مستنقعات وأراضي رطبة كتير، لكن ما بيجي جنية الحيوانات ضوافر رجله بتتأكل من الأسطح الصلبة زي الخرسانة والأسفلت وده بيسبب له تورم وتقرح وتشقق القدمين.

8- حمام الطينة من أهم الحاجات في يومه:

 بالنسبة لوحيد القرن فحمام الطينية اللطيف كأنه قضى يوم في الـ Spa، لإنه بيساعده يهدي في الجو الحر ومفيد لبشرته كمان وده بيساعده على التخلص من الحشرات المزعجة وعلى الرغم من إن الحيوانات جلدها تخين إلا إنها معرضة برضه إن الحشرات تقرصها ويجيلها حروق من الشمس 

9- قرونها من نفس مادة ضوافر الإنسان:

قرون وحيد القرن بتتكون من مادة اسمها “الكيراتين” وده اللي بيخلي الصيادين يقتلوا ألاف منهم عشان ياخدوا قرونهم ويبيعوهم ويتعمل منهم مجوهرات وتماثيل وفيه بعض الأماكن في آسيا بتعتقد إن لها خصائص علاجية.

10- خطر الانقراض:

قبل قرن كان فيه أكثر من نص مليون وحيد القرن في العالم دلوقتي بيعيش حوالي 30 ألف بس في البرية، وده بيرجع للصيد.. الأنواع الخمسة من وحيد القرن في خطر لكن 3 منها تعتبر مهددة بالانقراض بس وهما “سومطرة” و”جافان “ووحيد القرن الأسود، ولحد 2019 كان فيه حوالي 60 وحيد قرن “جافان” بس وأقل من 100 وحيد قرن “سومطرة”  وحوالي 5500 وحيد قرن أسود. 

وفيه بعض الأخبار بتقول إن بفضل جهود الحفاظ عليهم زادت أعداد وحيد القرن الأبيض والأسود في السنين الأخيرة.

Related Articles

Back to top button