موضوع مايهمكش: 3 طرق تكوي بيهم الطرحة لو معندكيش مكواة

بطبيعتنا كـ”بنات” بننزل دايمًا مستعجلين وبنلف في البيت كله فطار ولبس وسكين كير ومليون حاجة في نفس الوقت… تخيلي بقا وانتي في الزحمة دي كلها المكواة تبوظ قبل ما تكوني كويتي طرحتك.

وعشان “النساء للنساء” هنقولك تعملي إيه عشان تكوي الطرحة من غير مكواة

• طريقة رقم “1”: مكواة الشعر

جربي تكويها بمكوة الشعر بتاعتك بس حاولي متعليش درجة الحرارة.. أقل حرارة في المكوة هتنفع… وماتنسيش طبعًا إنها مش زي المكوة العادية… يعني ماتسبيهاش كتير.. عديها علي الطرحة بسرعه جدًا هتقضي الغرض ومش هتحرق الطرحة.

• طريقة رقم “2”: البخار

بِلي الطرحة حاجة بسيطة أوي.. وأفرديها على أي شماعة عندك وحطيها في حمام يكون فيه بخار من “الدُش”.

الطريقة دي تنفع برضو مع “السشوار” وهتديكي نتيجة حلوة وسريعة.

• طريقة رقم “3”: استخدمي إيدك

الطريقة دي هي الأسهل والأنجز فيهم عشان متتأخريش على مشوارك بِلي إيدك على خفيف و وانتي لابسه الطرحة “مَشي” إيدك على الطرحة وثبتيها على اللفة اللي عايزاها وبمجرد ما تنشف هتلاقيها إتكوت.

ماتنسيش إن دي طرق “بديلة” أكيد مش زي المكوة العادية والنتيجة بتفرق من نوع قماش للتاني.