موضوع مايهمكش: 7 حقايق ماتعرفهاش عن باباي

كلنا تقريبا عارفين البحار “باباي” أو عدى علينا الكارتون بتاعه كده وإحنا صغيرين، وفيه مننا اللي أهله حتى كانوا بيقنعوه بأكل السبانخ عشان “تبقى قوي زي باباي”.

يوم 17 يناير هو يوم باباي Popeye Day وبالمناسبة دي جمعنالكم شوية معلومات وحقايق ممكن متبقاش عارفها عن الشخصية الكرتونية المشهورة جدا.

1- باباي ومراته “زيتونة” كانوا شخصيات حقيقية، وكانوا ساكنين قريب من مبتكر شخصية باباي “إلزي سيجار”، وبسببهم جاله الإلهام إنه يعمل شخصية باباي وزيتونة.

2- حب باباي للسبانخ وفكرة إنها بتديله قوة خارقة، زود بيعها في أمريكا وفي أماكن كتير جدا في العالم لأنها شجعت الأطفال إنهم ياكلوها.

3- شخصية باباي هي أول شخصية كرتونية يبقى ليها تمثال سنة 1937. والتمثال في كريستال سيتي في تيكساس واتعمل لتكريم باباي على مساهمته في “صناعة السبانخ”.

4- في واحدة من حلقات الكرتون، باباي قال لولاد أخوه إنه من نسل هرقليز، وإن أجداده كانوا بيستمدوا قوتهم من الثوم، زي ما هو بيستمد قوته من السبانخ.

5- كلمات ومصطلحات كتير عامية موجودة في اللغة الإنجليزية دلوقتي سببها كرتون “باباي”

6- الأشخاص الحقيقية اللي عملوا أصوات “باباي” ومراته “زيتونة” واللي هم Jack Mercer و Margie Hynes اتجوزوا

7- سنة 1980، بعد عرض فيلم Popeye (من بطولة روبن ويليامز)، تم تحويل المكان اللي اتصور فيه الفيلم في مالطا لحديقة ترفيهية إسمها قرية Popeye. والناس بتزورها ويخرجوا فيها ويعملوا Picnics ويركبوا فيها مراكب.