موضوع مايهمكش: 7 نصايح تخلي الميكب بتاعك Glowy ومايشققش في الشتا
البنات بتحب كل حاجة في الشتا.. أجواء مناسبة للحب والارتباط وستايل لبسه كيوت.. وبتبقي ولا كأنك خارجة من فاشون شو.. بس الحاجة الوحيدة اللي متأكدين إنك مابتحبيهاش هي كلكعة الميكب وبهدلته وقتها.. وعشان كده هنقولك على كام نصيحة تخليكي تحطي ميكب شتوي يثبت ومايكلكعش ولا أجدعها ميكب أرتيست ولا عزاء لهدى بيوتي
1- ترطيب الشفايف
لو هتحطي ليب جلوس أو ليب ستيك أو ليب لاينر بس.. افتكري تحطي Lip” balm” الأول عشان ترطبي شفايفك لأن جلدها رقيق وبرد الشتا هيزود جفافها.. وكل ما زاد الجفاف هتلاقي الروج أو الليب جلوس متشقق وشكله مش أحسن حاجة.. فزي ما انتي مش عارفة تنسي الإكس اوعي تنسي الـ “Lip balm”
2- التحضير للميكب
عشان تاخدي اللوك الـ Glowy في الشتا وتعاندي البرد.. هيأي بشرتك وحضريها ليه ماتخضهاش.. فضروري تحطي سيروم ومرطب المناسب لنوع بشرتك عشان الجفاف بيزيد في الشتا.. وحاولي كل أسبوع تعملي تقشير لوشك عشان تتخلصي من الجلد الميت اللي بيبقى سبب في تكتل الميكب أصلًا
3- البرايمر
البرايمر بيطول مدة ثبات الميكب على وشك.. بس ضروري تختاري نوع البرايمر المناسب للشتا وطبعًا لنوع بشرتك.. فمثلًا في الصيف انتي بتحتاجي mattifying primer وده بيقفل مسام الوش عشان الزيوت والعرق في الصيف.. أما في الشتا بتحتاجي hydrating primer أكتر عشان بيرطب الوش
4- فاونديشن مرطب (Moisturizing Foundation)
الفاونديشن المرطب ده بيكون قوامه Oily كده فمناسب لجفاف الشتا والترتيب اللي وشك محتاجه.. وبيخفي مسام ومشاكل البشرة وكمية صغيرة منه بتكفي وشك كله وبتبعد عنك تكتل وكلكعة الميكب بعيد عنك وعن اللي بيقرأوا
5- افكسي للباودر
في الصيف انتي بتستخدمي الباودر عشان تطفي من لمعان بشرتك خاصة مع الحر والزيوت لكن في الشتا انتي مش محتاجة ده لأن أوريدي إفراز الزيوت لوشك أقل والجفاف بيكتر فمش محتاجة تطفي وشك أكتر بالباودر.. خاصة إنك لما هتحطي الباودر فوق الفاونديشن هيقلل من تأثير المرطب اللي بدأت روتين الميكب بتاعك بيه.. فممكن تحطي Setting spray بدل الباودر عشان تثبتي بيه الميكب بتاعك أحسن
6- الماسكرا والكحل
مش بس العياط في حمام الشغل والإكس اللي بيخلوكي تعيطي.. هواء الشتا كمان بيخليكي تدمعي.. وعشان كده استخدمي ماسكرا وكحل Waterproof منعًا بس لإرعاب الجميع بالماسكرا والكحل اللي هيهببوا.. بس خدي بالك لما تخلصي يومك تشيليهم كويس
7- تحت العين
عشان تحت عينك اللي ولع من جفاف الشتا هتحتاجي كريم مرطب مخصوص للعين وتدمجيه مع طبقة خفيفة أوي من الكونسيلر وتحطي بقى يا ست الكل بس ماتحطيش باودر بقى زي ما قولنا.. ساعتها مش هتلاقي أي تكتلات من اللي بتضايقك
وبعد النصايح دي هتعرفي تعملي ميكب مفيهوش غلطة تخرجي بيه في خروجات الشتا.. بس اللي مفيهوش غلطة فعلًا هو انتي بميكب ومن غير ميكب
