موضوع مايهمكش: 8 حاجات ماتعرفهاش عن الشرابات

الشرابات من أهم الحاجات الأساسية في حياتنا وبنستخدمها كل يوم خاصة في فصل الشتاء مانقدرش نستغنى عنها.. وعلى الرغم من إنها بتضيع مننا ومابنلاقيهاش ونفسنا نعرف أختفت فين إلا إن ده مش السر الوحيد اللي مانعرفوش عنها.. وبمناسبة يوم الشرابات هنقولك في الموضوع ده حاجات ماتعرفهاش عن الشرابات وفقًا لموقع  nocoldfeet و soxytoes : 

1- كلمة “sock” مشتقة من اللغتين اللاتينية واليونانية

مصطلح “Socks” مشتق من الكلمة اللاتينية soccus ومعناها الشراب الواسع اللي كان بيلبسه الممثلين الكوميديين في روما القديمة أو معناها الحذاء الخفيف اللي ليه كعب واطي.

2-أقدم شراب في العالم 

عمر أقدم شراب في العالم حوالي 1600 عام ولقوه في القرن ال19 في مقابر أوكسيرينخوس القديمة اللي كانت عبارة مستعمرة يونانية على نهر النيل في وسط مصر والشراب كان مصنوع من الصوف الأحمر وليه فتحات للصوابع 

3-الأشخاص اللي بيلبسوا شرابات مش شبه بعض على الأغلب بيكونوا متجوزين

وده لأنهم بيكونوا بيلبسوا شراباتهم في الضلمة عشان مايصحوش أزواجهم فبيلبسوه بالغلط قبل ما ينزلوا

4- الشرابات كانت بتتصنع زمان من مواد المختلفة 

كانت الشرابات زمان بتتصنع من جلود الحيوانات ومن الصوف المنسوج ومواد تانية من الطبيعة زي شعر الحيوانات قبل ما تتعمل من القطن والحرير والكتان

5-الشرابات الحرير كانت رمز لمكانة الأوروبيين من الطبقة العليا

في القرن العاشر كانت الشرابات الحرير رمز للثروة والمكانة العالية في المجتمعات الأوروبية الإقطاعية وده لأن الحرير كان سعره مكلف ومش أي حد يقدر يشتريه

6- في أيام مخصوصة للاحتفال بالشرابات

زي يوم 4 ديسمبر اللي بيعتبر يوم الشراب الوطني في أمريكا و إنجلترا بتعتبر يوم الشراب يوم 4 مايو وتم تخصيصه رسميًا باسم “يوم ذكرى الجوارب المفقودة”والبريطانيين بيحتفلوا من خلال لبس شرابات مش متشابهة تكريما للشرابات اللي ضاعت منهم

7-الشرابات بتساعد على النوم

الخبراء بيقولوا إن الشرابات الرقيقة الدافية  بتعزز الدورة الدموية بشكل أفضل في جميع أنحاء الجسم وقت النوم  وبتخلينا ننام مرتاحين أكتر بالليل

8- أكبر عاصمة بتصنع شرابات في العالم

منطقة “داتانغ” في الصين هي أكبر مكان بيصنع شرابات على مستوى العالم وصنعت حوالي 40% من الشرابات حول العالم في سنة واحدة 

وده خلاهم يطلقوا عليها اسم مدينة (sock)