موضوع مايهمكش: 9 حاجات ماتعرفهاش عن الشرابات النايلون
أكيد كل البنات جربوا يستخدموا الشرابات النايلون وأكيد كلفتهم كتير خصوصا إنها أكتر حاجة بتتقطع بسرعة مع أي شده فيها بتبقى قطعتها باينه وممكن كمان فيه ناس استخدمتها إنهم يعملوا بيها كورة شراب.
وتقديرًا للشربات النايلون اتعملها يوم مخصوص وهو يوم 15 مايو في كل سنة فقررنا بالمناسبة السعيدة دي نقولك 9 حاجات ماتعرفهاش عن النايلون زي ما قال موقع “phillymag” في واحد من مقالاته:
1- النايلون عموما هو اسم بيتم إطلاقه على البوليمرات الاصطناعية اللي بيتم معالجتها لألياف وأغشية وأشكال وبيتم استخدامها بشكل تجاري في كل حاجة زي الملابس وقطع غيار العربيات وأغلفة الطعام، وتم تطويره من علماء شركة اسمها “دوبونت” للمواد الكيميائية عن طريق عملية طويلة من التجارب، وأول منتج مصنوع من النايلون كان عبارة عن شعيرات لفرش أسنان وتم طرح شكل قماش النايلون في معرض نيويورك العالمي سنة 1939 وتم استخدامه لأول مرة في الشرابات النسائية واللي كانت بتتعمل وقتها من الحرير.
2- من بين الأسماء اللي فكروا فيها للنسيج الجديد ده كان “Klis” وهي كلمة حرير بس مكتوبة بالمقلوب ومن بين 400 اختيار كان فيه كمان “Nuron” و “DuPont Pulls A Rabbit Out Of a Hat” بس اختاروا في الأخر “نايلون”
3- النايلون مش أول نوع من الألياف الصناعية وكان فيه قبله تطوير لحرير الـ”رايون” المصنوع من لب الخشب في سنة 1855، لكن الفرق بينه وبين النايلون إن النايلون أول ألياف صناعية مصنوعة من الإنسان بالكامل واتعمل لإن الستات في الوقت ده محتاجة بديل أرخص لشرباتهم.
4- شركة DuPont باعت حوالي 4 مليون زوج شراب نايلون في يومين بعد ما تم طرحه للجمهور للبيع في يوم 15 مايو سنة 1940 بسعر 1.15 دولار لكل واحد ووقتها كان سعر رغيف العيش بـ 10 سنت.. وعشان كده يوم 15 مايو هو يوم الشرابات النايلون.
5- وللأسف بعد ما الستات عرفوا الشرابات النايلون أعلنوا عن الحرب العالمية التانية فشركة DuPont رجعت انتاجها من النايلون للمعدات العسكرية زي المظلات والخيام والحبال وحصل مشكلة في الشرابات النايلون عند الستات، وبعد 8 أيام من انتهاء الحرب ، أعلنت شركة DuPont إنها هتنتج الشرابات النايلون مرة تانية، وده اللي بسببه الناس كانت بتتخانق مع بعض في المحلات عشان يشتروا الشرابات النايلون.
6- شركة DuPont ماحددتش أبدا علامة تجارية للنايون، لإنها بتعتبره مش منتج جديد وإنه مادة جديدة زي الحديد والفحم.. وقال “تشارلز ستاين” من شركة DuPont لمجموعة سيدات في تقديم الاختراع: “ممكن يتم تشكيلها لخيوط قوية زي الفولاذ”
7- تم إصدار براءة الاختراع الأمريكية للنايلون لـ “والاس كاروثرز” وهو الكيميائي الرئيسي لشركة DuPont، واللي اتعين وقتها بعيد عن هارفارد لما جاله العرض ده شركة دوبونت سنة 1928 بمرتب أسبوعي قيمته حوالي 500 دولار.
8- “والاس كاروثرز” يعتبر بطل العالم الكيميائي ، لإن هو اللي اكتشف الـ “النيوبرين” وده يعتبر أول مطاط صناعي ناجح تجاريًا.
9- النايلون والأقمشة الصناعية التانية مابقوش موضة في الستينيات والسبعينيات لما رجع حرير والصوف والقطن يبقوا موضة تاني، ودلوقتي برضه فيه عدد قليل من الستات اللي بيلبسوا فساتين وشرابات، لكن اللبس الرياضي خلى الأقمشة الصناعية والمطاطة موضة تاني.
