موضوع يجوعك: شوف هتاكل إيه النهاردة؟

مشكلة كل ست بيت من أول يوم جواز لحد ما بتطلع على المعاش هي هتاكلوا إيه النهارده؟ ومش هي لوحدها ده كمان لمة الشغل اللي بتبقى مرة أو مرتين على الأقل في اليوم هناكل إيه في الفطار وتفكير تاني من الفطار للغدا عشان تشوفوا هتتغدوا إيه!

الاختيار بين أصناف الأكل شئ صعب ومش سهل إلا لو نفسك تاكل حاجة معينة.. بس عشان نسهل عليكوا موضوع اختيار الأكل ده هنقترح عليك في موضوع هنا كل يوم 3 وجبات تفطر وتتغدى وتتعشى بيهم وهنقولك كمان على “سناكس” تاكلها في النص اليوم أو آخره أنت ومواعيدك يعني.

1- وجبة الفطار: (أومليت بالخضار والجبنة):

البيض مليان فوايد صحية وصعب حد يبقى مابيحبهوش.. ودي مقادير البيض الأومليت بالخضار والجبنة:

1-  5 بيضات

2- معلقة صغيرة فلفل أسود

3- معلقة صغيرة ملح

4- 3 معالق كبيرة بصل مفروم

5- معلقة صغيرة ثوم مهروس

6- نص كوباية فلفل حلو مقطع مكعبات صغيرة

7- نص كوبابة مشروم طازة ومقطع

8- معلقة صغيرة زبدة

9- معلقتين كبار زيت

10- 5 شرايح جبنة موزاريلا

طريقة التحضير:

1- في طبق كبير نحط البيض ونضيف الملح والفلفل ونضربهم كويس ونحط بعد كده البصل المفروم الثوم والفلفل الحلو والمشروم ونضربهم تاني.

2- بنسخن زبدة في طاسة “تيفال” ونحط شوية زيت بعدين نصب خليط الأومليت اللي ضربناه في الطاسة ونقلبه الناحية التانية لحد ما يستوي. 

3- في الأخر بنحط شرايح الموزاريلا على الأومليت وبنغطي الطاسة لحد ما شرايح الجبنة تدوب.. وممكن تتاكل حاف وممكن تحطيها في عيش أو مع توست على حسب الرغبة.

2- وجبة الغداء: (كوسة بالبشاميل):

 

في الفطار البيض طبعا كان وجبة صحية ولطيفة على المعدة فماينفعش أكيد تسيب بطنك كده عايشة على الأكل الصحي ده طول اليوم.. عشان كده اختارنالك كوسة بالبشاميل ومعاها رز أبيض.0

المقادير:

1- كيلو كوسة

2- نص كيلو لحمة مفرومة

3- حبيتين بصل مبشورين

4- معلقتين سمنة كبار

5- رشة ملح

6- رشة فلفل أسود

7- ر0شة جوزة الطيب

8- معلقة كبيرة صلصة طماطم

مقادير البشاميل :

1- كيلو لبن

2- 4 معالق كبيرة دقيق أبيض

5- 4 معالق كبيرة سمنة 

طريقة التحضير:

1- هنجيب طاسة ونحط فيها زيت لحد ما يسخن وننزل عليه بالبصل المبشور لحد ما لونه يصفر.

2- هنحط عليهم اللحمة المفرومة ونقلب وبعدين نضيف الصلصة مع رشة الملح والفلفل الأسود وجوزة الطيب ونقلب لحد ما اللحمة تبقى نص سوا تقريبًا.

3- بعد ما نقشر الكوسة بنقطعها طرنشات حجمها متوسط، وفي نفس الطاسة اللي شلنا منها اللحمة المفرومة نحط معلقة زبدة لحد ما تسيح وننزل عليها بشرايح الكوسة ونديها رشة ملح وفلفل أسود ونقلب لحد ما تتشوح.

• طريقة تحضير البشاميل:

1- هنجيب حلة ونحط فيها سمنة لحد ما تسيح وبعدين ننزل الدقيق عليها ونقلبهم لحد ما لونهم يبقى أصفر وبعدين نضيف لبن تدريجي مع التقليب بسرعة لحد ما يبقى قوامها كريمي ونضيف عليها رشة ملح وفلفل أسود برضه.

• بعدين بنجيب صينية ندهنها بشاميل الأول ونحط فيها الكوسة المتشوحة وبعدين شوية لحمة مفرومة وبعدين طبقة كوسة تاني وبعدين ننزل بالبشاميل على الصينية كلها وندخلها الفرن لمدة نص ساعة.

وطبعا مش هناكل الكوسة بالبشاميل كده حاف لازملها شوية رز.. وأحسن نوع رز ممكن يتاكل معاها هو الرز الأبيض المفلفل ده.. خلينا نفكرك بطريقته مع إن أكيد مفيش حد مابيعرفش يعمله:

مقادير الرز الأبيض:

0

1- كوبايتين رز مصري

2- كوبايتين ونص مياه أو شوربة لحمة أو فراخ 

3- معلقة زبدة أو سمنة 

4- معلقة صغيرة ملح

طريقة التحضير:

1- نغسل الرز كويس وبعدين نصفيه من المياه تمامًا.

2- وعلى نار هادية نجيب حلة وندوب فيها السمنة وننزل بالرز وقلبيه شوية لوحده لمدة 4 دقايق تقريبا بس على نار هادية.

3- بنضيف المياه أو الشوربة ونحط الملح ونقلبه كويس لحد ما يتشرب بعدين نوطي النار (ونحط الشياطة لو عندنا) ونسيبه على نار هادية لمدة نص ساعة تقريبًا

3- وجبة العشاء: (ساندويتش التركي بالبسطرمة والجبنة):

اليوم خلص طبعا واللي عايز ياكل بيكسل يقوم يجيب علبة زبادي من التلاجة أصلا.. فالعشاء محتاج وجبة خفيفة مش على البطن لا على الرجل عشان مش قادرين نقف كتير في المطبخ.

• المقادير:

1- عيش فينو 

2- نص كيلو بسطرمة 

3- نص كيلو تركي مدخن 

4- نص جبنة شيدر أو جودة أو فلمنك 

5- زبدة 

• طريقة التحضير:

بنفرد الزبدة على العيش ونحط البسطرمة والتركي والجبنة على بعض وبنحط الساندويتش في الفرن لحد ما الجبن تسيح وبيتقدم سخن.. بس كده أومال أنت فاكر إيه؟

4- وجبة السناكس أو النقنقة: (تفاح بزبدة الفول السوداني والشوفان):

المقادير:

1- تفاحة

2- نص كوباية شوفان

3- معلقتين كبار زبدة فول سوداني

4- زبيب أسود

طريقة التحضير:

بنقطع التفاح شرايح متوسطة على شكل حلقات ونفرغها من النص وندهنها زبدة فول سوداني ونرش عليها شوفان وزبيب ونغطيها بشريحة تفاح تانية.

طبعا كفاية أكل في يوم واحد لحد كده وبنفكرك تشرب مياه كويس واعمل الشاي أو القهوة بتوعك بمزاج بين الوجبات وبعضها وبالهنا والشفا يا ست الكل.