موضوع يجوعك: 3 وصفات شوربة مختلفة لو زهقت من اللسان عصفور

النهاردة في #موضوع_يجوعك هنعمل 3 وصفات شوربة مختلفين

ممكن يكونوا “شوربات” (جمع شوربة) غريبة شوية على الترابيزة المصرية

بس هتعجبكم ونتمنى تجربوها وتقولوا رأيكم فيها.. ويلا نبدأ عالطول..

1- شوربة البطاطس بالبسطرمة:

شوربة بطاطس كريمي بالذرة والبسطرمة لطيفة جدًا مقاديرها هي:

1 كيلو بطاطس متقشرة كويس

2 لتر مرقة فراخ (شوربة يعني)

معلقتين كبار زيت زيتون

معلقتين كبار زبدة 

واحدة “كرات” متقطع

بصلة واحدة متقطعة 

معلقة صغيرة  كاري

4 معالق كبار كريم تشيز 

250 جرام بسطرمة 

كوباية سويت كورن

بهارات بقى ملح وفلفل أسود..

التحضير:

في حلة شوربة متوسطة أو Pan تشوحوا البصلة والكرات مع الكاري بزيت الزيتون والزبدة اللي حضرناهم لمدة دقيقتين لتلاتة وبعدين وطوا النار وحطوا البطاطس متقطعة مكعبات ومعاهم شوربة الفراخ وعليهم الفلفل الأسود والملح وخليهم على نار هادية يستوا كلهم سوا…

بعدين لما تستوي شيلوا الحلة من على النار وحطوا الشوربة في إناء التقديم لما تبرد، وعليها التشيزي كريم والبسطرمة والدرة الحلوة في الأخر.. وبالهنا والشفا..

2- شوربة الزفاف الإيطالي:

طبعًا بالإنجليش اسمها Italian Wedding Soup وهي شوربة إيطالية مشهورة وطريقة تحضيرها سهلة بس بتتكون من جزئين أساسين تجهيز “كرات اللحمة” كفتة لحمة مكورة يعني والجزء التاني الشوربة طبعًا…

الأول عشان تجهيز “كرات اللحمة” محتاجين: لحمة مفرومة وبيضة وItalian Breadcrumbs وده هتلاقوه بيتباع عادي في أي سوبرماركت كبير وجبنة بارميجان وبقدونس وتوم وطبعًا فلفل أسود وملح…

المكونات دي تقلبوها مع بعض كلها في طبق غويط وبعدين تعملوا منها كور لحمة متوسطة الحجم وبعدين تبدأوا تحمروها في حلة كبيرة كويس…

بعد ما تتحمر كرات اللحمة دي كلها تخروجها في طبق على جنب كبير وبعدين في نفس الحلة بتاعة التحمير تبدأوا تجهزوا الشوربة بقى ودي محتاجين لها:

جزر وبصل وكرفس وتوم وشوربة فراخ أو لحمة وبهارات الـ Italian Seasoning ومكرونة Acini di pepe ودي ممكن تلاقوها برضه في أي سوبرماركت كبير أو استبدلوها بأي نوع مكرونة تكون صغيرة وأخيرًا أوراق سبانخ طازة وخضرا وحلوة كدة…

مكونات الشوربة اللي فاتت دي نبدأ نشوح منها الجزر المتقطع هو والبصل والكرفس والتوم وعليهم البهارات وبعدين نضيف الشوربة ونسيب اللي فات ده كله لمدة 20 دقيقة يغلوا مع بعض شوية وبعدين نضيف المكرونة وكرات اللحمة وبعدين نسيبهم كلهم يستوا لمدة 10 دقايق كمان لحد ما تستوي المكرونة وفي الأخر خالص نضيف البقدونس والسبانخ الفريش ونسيبهم شوية وخلاص كدة الشوربة جهزت… وبالهنا والشفا..

وده فيديو زيادة كدة عشان لو الوصفة مش باينة أوي..

3- شوربة الفول سوداني الأفريقية: 

الوصفتين اللي فاتوا كانوا فيهم لحوم بشكل أو أخر أما الوصفة دي بقى للي مابيحبوش اللحوم بأي شكل

وتنفع للنباتيين كمان وهي شوربة من غرب أفريقيا ومحتاجين لها الحاجات دي..

بصل وجنزبيل وتوم وبطاطا  متطقعة مكعبات (آه البطاطا المسكرة دي بس المرة دي هنعمل بيها شوربة)

وفجل وكمون وعدس غامق (بجبة مش الأصفر) وفلفل مشطشط (بهارات)…

المكونات اللي فاتت دي كلها نحطها ونشوحها في حلة بالترتيب اللي قولناه بيهم ورا بعض وبعدين نحط فوقيهم صلصلة طماطم وبعدين نسقي كل ده بشوربة خضار (مرقة خضار) لحد ما تغطيهم ونسيبهم يستوا على نار هادية…

وبعدين نضيف maypul syrup وعصير ليمون نص كوباية صغيرة وبعدين ونص كوباية كبيرة زبدة فول سوداني مش مسكرة وبعدين كرنب أخضر من نوع collard greens وبعدين نقلب كل ده مع بعضه ونسيبهم يستوا شوية سوا وبس خلاص بعد كدة جاهزة الشوربة للتقديم.. وبالهنا والشفا…

وده برضه فيديو إكسترا للتوضيح أكتر..

كدة خلصنا الـ 3 وصفات شوربة بتوع المرة دي.. هنستنى رأيكم في الكومنتات وحابين نجيبلكم وصفات إيه تاني.. بون أبيتي…