موضوع يجوعك: 5 طرق مختلفة لعمل البرجر في البيت حفاظًا على مشاعرك

بعد انتشار تويت لبنت كتبت إن خطيبها خدعها لمدة 9 سنين وطلع كان متجوز وهي مش عارفة ولما واجهته قالها إنه كان قالها ده وهما بياكلوا برجر، فقولنا نعرفك على 5 طرق ممكن تعملي بيهم البرجر في البيت وبلاش تاكلي برجر في خروجة أو ديت مع صاحبك أو خطيبك عشان مايتضحكش عليكي ولا يتلعب بمشاعرك:

1- برجر اللحمة التقليدي:

المقادير:

1- لحمة مفرومة

2- فول صويا منقوع

3- بصل مفروم ناعم

4- ملح و فلفل

5- طماطم

6- فلفل رومى

7- عيش كيزر

8- ثوم بودرة

9- بقدونس مفروم

10- بيضة

11- كاتشب

12- مستردة

13- مايونيز

14- شرائح جبنة

طريقة التحضير:

1- هنفرم في الكبة فول الصويا و اللحمة و الملح و الفلفل و بودرة الثوم و البيضة و البصل و البقدونس وتوضع في الثلاجة لمدة ساعة تقريبا.

2- وبنخرجه من التلاجة وبنقسمه على شكل البرجر بكوباية وهنستخدم شوية مياه أو زيت عشان مايلزقش في ايدينا. 

3- بنشكل الجبنة على شكل كور صغيرة مع الفلفل الحراق وبنعمل زي تجويف أو حفرة في البرجر وبنحط كور الجبنة فيها وبنقفل قطعة البرجر تاني.

4- بعدين بندهن صنية بالزيت وبنحط فيها البرجر وبنسيب فرق بين القطع عشان يستوي كويس وبنسيبهم دقيقتين على النار لحد ما ياخد اللون الدهبي ونقلبه الناحية التانية.

5- بعدين بيتم تقديمه في عيش ومعاه الإضافات بتاعته زي البصل والطماطم والخس  والكاتشب والمايونيز والمستردة وممكن يبقى جنبهم بطاطس محمرة.

2- برجر بالجبنة الشيدر:

المقادير:

1. كيلو لحمة مفرومة
2. معلقة ملح ناعم
3. معلقة فلفل ناعم
4. 1/2 كيلو جبنة شيدر
5. 1/4 كوباية زيت

طريقة التحضير:

1- هنجيب اللحمة ونحط الملح والفلفل ونقلبهم في بعض

2- هنفرد اللحمة على كيس هنجيب كوبايه ونعمل اللحمة على شكل دواير أو قرص

3- هنرص البرجر في صنينة وندخله التلاجة ساعة تقريبا

4- بعد كده هنطلعها ونحط على كل قطعة جبنة ونغطيها بقطعة تانية

5- ونحطهم على أكياس ونقفل الأكياس كويس ونحطها في الفريزر حوالي ساعة ولو لمدة يوم يبقى أحسن 

6- وبعدين بنجيب طاسة ونحط فيها الزيت لحد ما يسخن ونحط البرجر يتحمر اوعلي الشواية وبيتقدم وبالهنا والشفا.

3- برجر الفراخ:

المقادير:

1. كيلو صدور دجاج مخلية من العضم والجلد
2. ملعقتين صغيرين بابريكا
3. معلقة صغيرة بودرة الزنجبيل
4. 1/2 معلقة صغيرة حبهان مطحون
5. معلقة بودرة بصل
6. معلقة بودرة ثوم
7. بشرة ليمونة
8. معلقة صغيرة بهار أبيض
9. 1/2 معلقة صغيرة بهار أسود
10. نص كوباية بقسماط 
11. بيضة واحدة
12. ملح 

طريقة التحضير:

1- بعد ما نغسل الفراخ وننقعها في الملح والخل وقطع الليمون بنصفى الفراخ كويس ونطخنها في الكابة.

2- بنضيف الكابة البهارات والملح والبيضة والبقسماط وبشرة الليمونة وبنعجنهم كويس لحد ما تطلع عجينة متماسكة.

3- لو عندنا قالب الهمبرغر نستخدمه عشان نعمل الاقراص أو ممكن نقطعها بالكوباية زي ما قولنا في الطرق اللي فوق.

4- بنجيب طاسة وبنحط فيها حتة زبدة ونسيبه يتشوي على نار هادية، وبنقسم العيش الكايزر نصين وبنخليه ياخد اللون الدهبي على نفس الطاسة 

5- في طاسة تانية بنحط شرايح البصل عشان يتكرمل وبنحط الطماطم تدبل سنة صغيرة وبنرفعهم من على النار وبناخد العيش اللي كان على الطاسة الأولى وبنحط عليه كاتشب ومايونيز ومستردة.

6- وبعدين ما برجر الفراخ يستوي بنحط عليه شرايح الجبنة، ونحط برجر الفراخ بالجبنة على العيش وبنضيف عليهم خس والطماطم والبصل المتكرمل وخيار مخلل.. وبالهنا والشفا يا ست الكل.

4- البرجر بالمشروم والجبنة:

المقادير:

1- 800  جرام لحمة 

2- 5 شرائح جبن برجر

‏3- كوباية مشروم مقطع

4- معلقتين كبار زيت

5- معلقتين كبار جبنة كريمي

6- معلقة كبيرة زبدة

7- معلقة صغيرة خل بلسميك

8- معلقة صغيرة ملح

9- معلقة  صغيرة مستردة

10- نص معلقة صغيرة فلفل أسود

11- نص معلقة صغيرة زعتر

12- خس

طريقة التحضير:

1- بنسحن الزبدة في طاسة وبنضيف لها المشروم ومع التقليب بنضيف ملح وفلفل وزعترونكمل تقليب لحد ما المشروم يبقى لونه دهبي، وبنضيف بعد كده الخل البلسمي مع التقليب، وبنشيل المشروم من النار.

2- بنخلط الحمة في طبق مع الملح والفلفل والمستردة وبنقسم الخليط لـ 5 قطع متساوية، وبنشكلها على هيئة البرجر وبنحطها في التلاجة لمدة ساعة على الأقل.

3- بنسخن زيت في طاسة كبيرة وبنحط البرجر ياخد لون دهبي ونقلبه الناحية التانية لمدة 10 دقايق تقريبًا، وبعدين بنحط معلقة جبنة كريمي فوق كل قطعة مع الماء، وبنغطيها لمدة 3 دقايق على النار

4-بنحمص العيش في الزبدة شوية وبنشيله ونحط عليه البرجر والخس وضع طبقة من الخس عليه والمشروم والكاتشب والمايونيز والمستردة.

5- برجر بالبيض:

المقادير:

1. عيش كيزر
2. 4 قطع برجر
3. 4 بيضات
4. خس
5. طماطم
6. خيار مخلل
7. مايونيز ومستردة وكاتشب
8. فلفل اسمر

طريقة التحضير:

1- نفس طريقة تحضير البرجر التقليدي اللي وصفناها في أول طريقة ونقليه كويس.

2- بنجهز الخس والطماطم والخيار ونقطعهم.

3- وفي طاسه بنحط شوية زيت ونكسر البيضه بس من غير ما تتقلب بنخليها بيض عيون ولما تستوي كويس وتتماسك بنقلبها النايحة التانية.

4- بنجيب العيش ونضيف عليه الكاتشب والمايونيز والمستردة وخس وطماطم وخيار مخلل بعدين بنضيف قطعة البرجر وقطعة البيض ورشة فلفل وخس تاني وبالهنا والشفا.

وبكده نبقى قولنالك على أغلب طرق البرجر اللي ممكن تتعمل ولو مش عجبك أي واحدة منهم ممكن تطلبي دليفري وتاكلي البرجر اللي بتحبيه وأنتي قاعدة في البيت بكرامتك ولا حد يستغفلك ولا يضحك عليكي ولا تمرمطي مشاعرك معاكي ولا معانا.