موعد إصدار Call of Duty: Warzone Mobile وأخبار تانية في الملخص الأسبوعي

مساء أو صباح على جيمرز جلوكال حسب وقت قراءتكم للموضوع ده، ده ملخص الأسبوع اللي بنتكلم فيه عن أهم الأخبار اللي حصلت خلال الأسبوع اللي فات في عالم الفيديو جيمز وما يخصه، خلونا نبدأ موضوع بتسريبات بتقول إن لعبة Valorant هيتم طرحها على بلايستيشن وإكس بوكس، وسبب التسريبات هو إن الاستوديو نزل إعلان بيدور فيه على لاعبين محترفين في ألعاب التصويب عشان يختبروا محتوى متعلق باللعبة ودي مش أول إشاعة تقول كده ولكن من الواضح إنها بتتأكد كل شوية وفي عالم الفيديو جيمز لما حاجة بيكتر الكلام عليها بتطلع حقيقية بنسبة كبيرة ولكن في كل الأحوال لو تم الإعلان بشكل رسمي هنقولكم.

وفي سكة التسريبات برضه، في تسريب بيقول إن لعبة EA Sports FC هيتم طرحها في سبتمبر القادم.

وده هيكون أول جزء من سلسلة FIFA بس بعد ما اتغير اسمها لـ EA Sports FC.

شركة سوني أعلنت عن قائمة الألعاب المجانية اللي هتبقى متاحة للمشتركين في خدمة PlayStation Plus لشهر يوليو، والألعاب هتتوفر بداية من 4 يوليو وحتى نهاية الشهر.

لعبة Call of Duty: Black Ops Cold War لـ PS4 و PS5.

لعبة Alan Wake Remastered لـ PS4 و PS5.

لعبة Endling – Extinction لـ PS4 و PS5.

الرئيس التنفيذي لشركة Activision أعلن في جلسة مايكروسوفت ولجنة التجارة الفيدرالية إن لعبة Call of Duty: Warzone Mobile هيتم طرحها في خريف عام 2023.

وخلال نفس الجلسة دي، في أخبار انتشرت إن قاضي المحاكمة سرب بالغلط موعد إصدار لعبة Call of Duty: Modern Warfare III وقال إنها هتكون في نوفمبر 2023.