مين بدأ فكرة عيد الأم؟ وليه بنحتفل بيه يوم 21 مارس بالتحديد؟
أكيد وأنت قاعد مع نفسك بتسأل نفسك شوية أسئلة وجودية من بتوع قبل النوم كده سألت نفسك ليه عيد الأم يوم 21 في الشهر؟ وليه اختاروا اليوم ده مش أول الشهر مثلا والناس معاها فلوس تعرف تجيب هدية حلوة عليها القيمة؟
والحقيقة هو إن عيد الأم ده اللي بنحتفل بيه يوم 21 مارس مش يوم عالمي موحد في العالم كله.. لكن ده تاريخ بيختلف في أماكن كتير يعني مثلا في أمريكا بيحتفلوا بعيد الأم في تاني حد من شهر مايو دايمًا لكن بالنسبة لنا عيد الأم هو 21 مارس.. طاب إزاي وإيه حكايته ومين بدأ فكرة عيد الأم وليه بالذات تم تحديد اليوم ده؟
ولما دورنا لقينا موقع بوابة الأهرام بيقول في أحد مقالاته السبب وهو إن فكرة الاحتفال بعيد الأم العربي بدأت من 2 أخوات وهما مصطفى أمين وعلى أمين وبترجع أصل الفكرة لما وصلت رسالة لعلي أمين من أم بتشتكي له من قسوة أولادها وسوء معاملتهم لها، وكانت بتتألم من نكرانهم للجميل، واتكرر المشهد ده مرة تانية لما زارت واحدة من الأمهات الكاتب الصحفي الراحل مصطفى أمين أخو علي أمين في مكتبه وقالتله إنها أرملة وعندها أولاد صغيرين وماتجوزتش تاني وحياتها وقفت على ولادها لحد ما اتخرجوا من الجامعة واتزوجوا وكل واحد بقى له حياته ومستقل بيها، ومابقوش يزورونها إلا على فترات بعيدة جدا.
فالصحفي الراحل مصطفى أمين كتب في عموده الشهير “فكرة” وقال: “لم لا نتفق على يوم من أيام السنة نطلق عليه يوم الأم، ونجعله عيدًا قوميًا في بلادنا وبلاد الشرق، وفى هذا اليوم يقدم الأبناء لأمهاتهم الهدايا الصغيرة، ويرسلون للأمهات خطابات صغيرة يقولون فيها “شكرا” أو “ربنا يخليك”؟ لماذا لا نشجع الأطفال فى هذا اليوم أن يعامل كل منهم أمه كملكة فيمنعوها من العمل، ويتولون هم فى هذا اليوم كل أعمالها المنزلية بدلا منها، لكن أي يوم من السنة نجعله عيد الأم؟”.
وبعد ما تم نشر المقال ده، القراء اختاروا إنهم يحددوا يوم 21 مارس عشان يبقى عيدا للأم، كمقترح لتخصيص يوم للأم، وبدأت تيجي جوابات كتير بتشجع الفكرة ووافق عليها أغلب القراء وشاركوا في اختيار اليوم ده عشان يكون عيد الأم واللي هو أول يوم من أيام فصل الربيع.
واحتفلت مصر بأول عيد أم سنة 1956.. ومن مصر خرجت الفكرة لباقي البلاد العربية، وعدى على أول عيد أم احتفلت مصر بيه حوالي 68 سنة
وفيه بعض الروايات بتقول إن بيرجع تاريخ الاحتفال بعيد الأم يوم 21 مارس لزمن الفراعنة زي ما قال دكتور محمد بكر المدير السابق لهيئة الآثار المصرية لموقع العربية.. دكتور محمد بكر قال إن الفراعنة كانوا بيحترموا النساء أوي وده بيبان في الرسوم في معابدهم بشكل محدد أكتر احتفلوا بالأمهات،
وقال إن إيزيس هي ملكة فرعونية قديمة، كانت رمز للأمومة.. وكان المصريين بيعملوا قوارب مليانة ورد بتطفو حولين المدن المصرية في اليوم اللي متحدد للاحتفال، وهو تقليد تابع للإغريق والرومان.
وقال دكتور بكر إن الحضارات التانية اللي احتفلت بعيد الأم من الوقت ده اتطورت للي هي فيه دلوقتي.. وإن بعض المؤرخين بيعتقدوا إن اليوم ده أنشأه اليونانيون واحتفلوا به في مارس مع بداية الربيع، زي الفراعنة اللي احتفلوا عن قصد في الربيع لأنه كان الموسم اللي بتتفتح فيه الأزهار، وده بيرمز إن الأمومة هي الحياة
ولكن الفكرة اتطورت.. ووفقًا للمؤرخين المصريين فالفكرة رجعت تاني في العصر الحديث على ايد ناشطة أمريكية اسمها “جوليا وارد” في القرن الـ 19 لما أصدرت إعلان “عيد الأم من أجل السلام”، وكانت متصورة إنه يوم سلام لتكريم الأمهات اللي فقدوا ولادهم في الحرب الأهلية.. وفي الوقت ده تم رفض التاريخ لكن بقى إجازة رسمية في أمريكا في أوائل القرن العشرين تحت قيادة الناشطة “آنا جارفيس”.
